‘मापात पाप’ भोवले ; भुसावळच्या गोदामपालाचे अखेर निलंबन

जि.प.सदस्यांच्या तक्रारीनंतर प्रशासनाची कारवाई

भुसावळ– भुसावळातील स्वस्त धान्याचा घोटाळा उघड झाल्यानंतर अखेर गोदामपाल डी.आर.जगताप यांचे निलंबन करण्यात आल्याची माहिती सूत्रांनी दिली.

जिल्हा परीषद सदस्य पल्लवी प्रमोद सावकारे यांनी शासकीय गोदामातील मापातील पाप प्रकरण बाहेर काढत माजी मंत्री एकनाथराव खडसे यांच्याकडे तक्रार केली होती तर याचवेळी वरणगाव येथे पाठवण्यात येणारा धान्य साठा सील करण्यात आला होता. मुंबईच्या दक्षता समितीने या धान्य साठ्याची मोजणी केल्यानंतर त्यात 50 क्विंटलमागे एक ते दोन किलो धान्य सरासरी कमी आढळले होते शिवाय गोदामातील धान्यातही अफरातफर झाल्याचे सिद्ध झाल्याने कारवाईकडे लक्ष लागले होते. जिल्हाधिकार्‍यांनी भुसावळचे गोदामपाल जगताप यांचे निलंबन केले असून त्यांची धरणगाव येथे बदली केली आहे. दरम्यान, गोदामपालानंतर आता पुरवठा अधिकारी आर.एल.राठोड यांच्यासह अन्य कोणत्या अधिकार्‍यांवर काय कारवाई होते? याकडे तालुक्याच्या नजरा लागल्या आहेत. मुक्ताईनगरसह चाळीसगावात काय कारवाई झाली? याबाबत माहिती कळू शकली नाही.