मालिकांमध्ये कामाची ऑफर देऊन देहव्यापार रॅकेट उघड

मुंबई । मालिका आणि सिनेमांमध्ये काम मिळवून देतो असे म्हणत तरुणींकडून देहव्यापार करुन घेणार्‍या रॅकेटचा मुंबईत पर्दाफाश करण्यात आला आहे. मुंबईतील मालाडमधील बांगूर पोलिसांनी सापळा रचून ही कारवाई केली आणि दोन जणांना ताब्यात घेतले. दोघांपैकी एकाचे नाव महुल वाघेला आहे, जो टीव्ही मालिकांमध्ये छोट्या-मोठ्या भूमिका करतो. सामाजिक कार्यकर्ते अमित जलान यांना या सेक्स रॅकेटची माहिती मिळताच त्यांनी मुंबई पोलिसांना ही माहिती कळवली. पोलिसांनी काल रात्री खोटे ग्राहक बनून मालाडमधील एका हॉटेलमध्ये या एजंट आणि मुलींना बोलावून घेतले. यात दोन अल्पवयीन मुलींसह काही मॉडेलचा समावेश होता. पन्नास हजार ते दोन लाख रुपयांपर्यंत त्यांची किंमत केली जात होती. पोलिसानी रंगेहात हे रॅकेट पकडून दोन अल्पवयीन मुलींसह एकूण पाच मुलींची सुटका केली. बांगूर नगर पोलीस ठाण्यात पोस्को, पिटा कायद्यांतर्गत गुन्हा नोंदवण्यात आला आहे.