मिनी ट्रेनच्या वातानुकूलीत बोगीला प्रवाशांकडून पसंती

मुंबई : हिवाळ्यात माथेरानमध्ये पर्यटकांची वाढणारी गर्दी आणि मिनी ट्रेनला मिळणारा प्रवाशांचा प्रतिसाद पाहून मध्य रेल्वेने मिनी ट्रेनला एक वातानुकूलीत डबा जोडला आहे. 8 डिसेंबरपासून हा एसी डबा प्रवाशांच्या सेवेत दाखल झाला. तेव्हापासून म्हणजे, 8 डिसेंबर पासून 18 डिसेंबरपर्यंत मध्य रेल्वेला 78 हजार रुपयांची कमाई झाली आहे.

माथेरानच्या मिनी ट्रेनच्या वातानुकूलीत बोगीला प्रवाशांकडून मोठ्या प्रमाणात पसंती मिळत आहे. नेरळ ते माथेरान अशा 6 थेट फेर्‍यांपैकी अप आणि डाऊन अशा दोन्ही फेर्‍यांना एसी कोच जोडण्यात आला आहे. मिनी ट्रेनच्या वातानुकूलीत बोगीमुळे सुरुवातीच्या 3 दिवसांतच मध्य रेल्वेने 30 हजार रुपयांची कमाई केली होती.

16 प्रवाशांची क्षमता असलेल्या वातानुकूलीत डब्याचे तिकीट प्रतिप्रवासी 415 रुपये आहे. त्यानुसार 10 दिवसांत नेरळ ते माथेरान प्रवासाची 140 तिकिटे विकली गेली आहेत. यामधून मध्य रेल्वेला 58 हजार 100 रुपयांची कमाई झाली आहे, तर माथेरान ते नेरळ परतीच्या प्रवासाची 48 तिकिटे विकले गेले असून यामधून 19 हजार 920 रुपयांची कमाई मध्य रेल्वेला झाली आहे.