मीडिया ट्रायल करून माझे भविष्य खराब करू नका!
पुणे । जम्मू-काश्मीरमध्ये प्रजासत्ताकदिनी पुण्यातील 18 वर्षीय तरुणी आत्मघाती बॉम्बहल्ला करू शकते, असा संशय तपास यंत्रणांनी व्यक्त करत काश्मीरचे पोलिस महानिरीक्षक (आयजी) मुनीर खान यांनी पत्रक काढल्यानंतर सर्वत्र हाय अर्लटचा इशारा देण्यात आला होता. मात्र, तपासाअंती मी निर्दोष सिद्ध झाले आहे. दोन वर्षांपूर्वी बारावीत असताना सोशल मीडियाच्या माध्यमातून मी इसिस संघटनेबाबत काही कमेंट, मेसेज केले होते. त्यावरून दहशतवादविरोधी संघटनेने (एटीएस) मौलवींच्या मदतीने डिरॅडिकलाइज केल्याने मी त्यातून संपूर्णपणे बाहेर पडले. मात्र, माझ्या भूतकाळावरून भविष्य खराब करण्याचा प्रयत्न केला जात असल्याचे आरोप सादिया शेख हिने सोमवारी पत्रकार परिषदेत व्यक्त केला.
नर्सिंगच्या प्रवेशासाठी तिकडे गेले होते…
जम्मू-काश्मीरमध्ये नर्सिंग महाविद्यालयात प्रवेश घेण्यासाठी आईसोबत 16 जानेवारी रोजी पुण्यातून विमानाने श्रीनगरला गेले. एक दिवस आधी त्या ठिकाणच्या मैत्रिणीला मी येत असल्याची कल्पना दिली होती. त्यानुसार महाविद्यालयात प्रवेश होईपर्यंत मैत्रिणीकडेच थांबले. 25 जानेवारीला एका वृत्तपत्रात सादिया शेख ही तरुणी आत्मघाती हल्ला करणार असल्याची बातमी मी वाचली. याबाबत आईला फोन करून मी विचारणा केली. यादरम्यान, पुणे पोलिसांनी माझ्या कुटुंबीयाशी संर्पक साधून सादिया कुठे आहे, अशी विचारणा केली. तसेच तिला व्हिडिओ कॉन्फरन्सवर बोलण्यास सांगा अथवा तिला पुण्यात येण्यास सांगा, असा निरोप दिला. यापुढे काय करायचे याबाबत मी आईसोबत बोलून ठरवत होते. दरम्यान, जम्मू आणि पुणे पोलिसांच्या चौकशीत मी निर्दोष ठरले आहे. तरीदेखील माझी बदनामी झाली. भूतकाळावरून माझे भविष्य खराब करण्याचा प्रयत्न करू नये, असे आवाहनही तिने केले.
मीडिया ट्रायल चुकीची…
सादिया शेख हिचे वकील दिनेश गिते यांनी सांगितले की, संविधानाच्या अधिकारानुसार तिने कुठे शिक्षण घ्यावे, कुठे जावे हा तिचा सर्वांसारखाच हक्क आहे. या घटनेमुळे तिचे कुटुंबीय दहशतीखाली असून प्रसारमाध्यमांनी काही निष्पन्न होण्यापूर्वीच मीडिया ट्रायल केली ही चुकीची बाब आहे. ज्या माध्यमांनी याप्रकरणी चुकीचे वार्तांकन केले त्यांना नोटीस देण्याबाबत कायदेशीर बाबींची पडताळणी करत असल्याचे जमाते मुस्लिम मूलनिवासी मंचाचे संयोजक अंजुम इनामदार यांनी यावेळी सांगितले.