मुंबईच्या लाइफलाइन लोकलमधील महिलांच्या डब्यात आता ‘एस्कॉर्ट्स’
मुंबई । मुंबईची लाईफलाइन म्हणून लोकल ओळखली जाते. या लोकल गाड्यांमध्ये पुरुष प्रवाशांबरोबर महिला प्रवाशांचीही संख्या वाढत आहे. मात्र, त्याचवेळी महिला प्रवाशांची छेडछाड होणे, त्यांची छळवणूक होणे असे प्रकार घडत असतात. त्यामुळे लोकलमध्ये महिलांच्या सुरक्षेचा प्रश्‍न ऐरणीवर आला आहे. त्यामुळे यावर उपाययोजना करण्याचा रेल्वे प्रशासनाचा वारंवार प्रयत्न चालू असतो. गेल्या काही दिवसांमध्ये घडलेल्या घटनांमुळे लोकलमध्ये खरेच महिला सुरक्षित आहेत का? असा प्रश्‍न उपस्थित केला जात आहे. मात्र, यावर आता मध्य रेल्वेने उपाययोजना केली आहे. मध्य रेल्वेने महिलांच्या डब्यात रात्रीच्या वेळी रेल्वे पोलीस ठेवण्याचा निर्णय घेतला आहे. हे जवान रात्री 9 ते सकाळी 6 वाजेपर्यंत महिलांच्या डब्यात तैनात असणार आहेत.
फर्स्ट आणि सेकंड क्लास डब्यात असणार एस्कॉर्ट्स
मध्य रेल्वेच्या लोकलमधून महिलांच्या डब्यात प्रवास करणार्‍या एका विद्यार्थिनीने काही दिवसांपूर्वी धावत्या ट्रेनमधून उडी मारून आपला जीव वाचवण्याचा प्रयत्न केला होता. सीएसएमटी स्थानकावर रविवारी सकाळच्या सुमारास ही मुलगी लोकलमध्ये चढली. महिलांचा डबा असूनही एक अनोळखी इसम त्या डब्यात चढला आणि तिच्याशी जवळीक करू लागला. हा प्रकार पाहून तरूणीने चेन खेचून ट्रेन थांबवण्याचा प्रयत्न केला. मात्र, ट्रेन न थांबल्यामुळे अखेर धावत्या ट्रेनमधून उडी मारून या तरुणीने पुढील अघटित घडण्यापासून वाचवले.
रात्री 9 ते सकाळी 6 वाजेपर्यंत जवान तैनात असणार
काही दिवसांनी या इसमाला अटक झाली असली, तरी या आणि अशा अनेक घटनांमुळे रेल्वेतून प्रवास करणार्‍या महिलांच्या सुरक्षेचा प्रश्‍न वारंवार समोर आला आहे. त्याच पार्श्‍वभूमीवर रेल्वेने घेतलेला हा निर्णय महत्त्वाचा मानला जात आहे. सीएसएमटीच्या दिशेकडे असणारा महिलांचा डबा, तर सीएसएमटीकडील महिलांच्या फर्स्ट क्लास डब्यात, सीएसएमटीकडून सहाव्या महिलांच्या डब्यात रात्री 9 ते सकाळी 6 वाजेपर्यंत हे जवान तैनात असणार आहेत.