मुंबईत 216 हून जास्त प्राथमिक शाळा अनधिकृतरीत्या सुरू

मुंबई । मान्यता नसलेल्या शाळांचा सुळसुळाट झाल्याने मनपा शिक्षण विभाग त्रस्त झाला आहे. महापालिका क्षेत्राच्या हद्दीत मागील काही वर्षांत शिक्षण विभागाची मान्यता न घेताच तब्बल 216 हून जास्त प्राथमिक शाळा अनधिकृतरित्या सुरू आहेत. या शाळांना कोणत्याही प्रकारची मान्यता नसून, त्या बोगस असल्याची माहिती महापालिका शिक्षण विभागाकडून दिली जात आहे. या शाळांना नोटीसदेखील बजावण्यात आल्या आहेत. दिवसेंदिवस बोगस शाळांच्या संख्येत वाढ होत असल्याने शिक्षण विभागातील अधिकारी परेशान झाले आहेत.

शिक्षणाधिकारी महेश पालकर यांनी सांगितले की नोटीस बजावल्यानंतरही या अनधिकृत शाळा आजतागायत सुरू आहेत. शिक्षण विभागाने शाळा आणि त्यांच्या पत्त्यांसह जाहिरात करून यात विद्यार्थ्यांनी प्रवेश घेऊ नये, असे आवाहन केले आहे. मात्र, त्यानंतरही या शाळांमध्ये मोठया प्रमाणात प्रवेश सुरू असल्याने येत्या दोन दिवसांत या अनधिकृत शाळांना आम्ही पुन्हा एकदा नोटीस बजावणार आहोत, अशी माहिती यांनी दिली.

मुंबईत अनधिकृतरीत्या चालवण्यात येत असलेल्या शाळांमध्ये अनेक नामवंत संस्थांच्या शाळांचा समावेश आहे. काही ठिकाणी नव्याने या शाळा सुरू करण्यात आल्या आहेत. यात सर्वाधिक 44 शाळा या कुर्ला, मानखुर्द, गोवंडी, शिवाजीनगर, एम पूर्व या वॉर्डात चालवल्या जात आहेत. त्याखालोखाल या अनधिकृत शाळा घाटकोपर एल वॉर्ड आणि एम पूर्व या वॉर्डात आहेत, तर सर्वात कमी अनधिकृत शाळा या ए वॉर्डात आहेत. विक्रोळी, भांडुप, बोरिवली, दहिसर, जोगेश्‍वरी, मुलुंड, गोरेगाव, अंधेरी, वडाळा, धारावी, माहीम, रे रोड, माझगाव, नायगाव, दादर, भायखळा, डोंगरी या भागातही या बोगस शाळा सर्रासपणे सुरू आहेत. या शाळांमध्ये प्रवेश घेणार्‍या मुलांचे नुकसान होऊ नये, यासाठी पुन्हा नोटीस बजावली जाणार असल्याची माहिती शिक्षणाधिकारी पालकर यांनी दिली आहे.