मुलींचा जन्मदर घटला

मुंबई : राज्यातील मुलीच्या जन्मदरात घट झाल्याची माहिती आरोग्य विभागाच्या अहवालातून उघड झाली आहे. नागरी नोंदणी अहवालानुसार 2015 साली महाराष्ट्राचे लिंग गुणोत्तर 1000 मुलांमागे 907 मुलींचे होते. मात्र 2016 या वर्षात या गुणोत्तरात जवळपास 8 टक्क्यांची घट झाली आहे. 2016 मध्ये राज्यातील मुलींचा जन्मदर 899 इतका कमी झाला आहे. पुण्यामध्ये 2014 पर्यंत स्त्री-पुरुष जन्मदरात वाढ पाहायला मिळत होती. मात्र 2015 साली पुण्याचे लिंग गुणोत्तर 1000/891 वर आले, तर 2016 साली मुलींचा जन्मदर जवळपास तब्बल 53 टक्क्यांनी घसरला. त्यामुळे पुण्याचे लिंग गुणोत्तर 1000/838 वर आले आहे.

राज्यात सर्वच जिल्ह्यांमध्ये मुलींच्या जन्मदरात घट झाली आहे. यात वाशिम जिल्हा आघाडीवर असून वाशिममध्ये लिंग गुणोत्तरात 62 टक्क्यांची घट झाली आहे. वाशिमपाठोपाठ पुण्यासह उस्मानाबादमध्ये लिंग गुणोत्तरात घसरण झाली आहे. या जिल्ह्यांमध्ये 53 टक्क्यांनी मुलींचा जन्मदर घटला आहे.

मात्र, भंडारा जिल्ह्यात मुलींचा जन्मदर जवळपास 78 टक्क्यांनी वाढला आहे. भंडारा पाठोपाठ परभणी आणि लातूरमध्ये मुलींच्या जन्मदरात वाढ झाली आहे. सर्वसाधारणपणे 1000 मुलांमागे 951 मुलींचे प्रमाण असणे गरजेचे आहे. हे प्रमाण कमी झाल्यास ती चिंतेची बाब समजली जाते.