बीफ खाणारे म्हणून युवकांनी केली मारहाण

नवी दिल्ली : बीफ खाणारे म्हणून हिणवत एका टोळक्याने 15 वर्षीय मुलास जबर मारहाण केली व चाकूने भोसकले, यातच त्याचा मृत्यु झाला असल्याची माहिती मृतकाच्या भावाने पोलिसांना दिल्याने या घटनेतील सत्य उघड झाले आहे. या प्रकरणी एकाला अटक केली असून इतरांनाही लवकरच अटक करण्यात येईल, अशी माहिती पोलिसांनी दिली.

दिल्लीहून मथुरेकडे जाणार्‍या पॅसेंजर गाडीत बसण्याच्या जागेवरून झालेल्या वादातून गुरुवारी 15 वर्षांच्या जुनैद नावाच्या मुलाची हत्या करण्यात आली. या प्रकरणात धक्कादायक माहिती आता समोर आली आहे. पॅसेंजरमधून प्रवास करणार्‍या टोळक्यानं पोषाखावरून आम्ही मुस्लिम आहोत हे ओळखलं आणि टोमणे मारण्यास सुरुवात केली. त्यानंतर बीफ खाणारे म्हणून आरोप करत मारहाण करण्यास सुरुवात केली, अशी माहिती मारहाणीत मृत्यू झालेल्या मुलाच्या भावाने दिल्याने या प्रकरणाचा उलगडा झाला.

जखमीने दिली माहिती
टोळक्यातील तरुणांनी आमच्या डोक्यावरील टोपी उतरून फेकून दिली. त्यानंतर माझ्या भावाची दाढी खेचायला लागले. आम्ही मुस्लिम आहोत, यावरून त्यांनी अपमानास्पद टिप्पणी केली. बीफ खाणारे असे म्हणत आम्हाला मारहाण करण्यास सुरुवात केली. त्यातील एकाने जुनैदवर चाकूने वार केले आणि त्यानंतर हाशिम आणि माझ्यावर हल्ला केला. शाकिरच्या छातीवरही सपासप वार केले. वार केल्यानंतर आरोपींनी त्यांना आसोटी स्थानकाजवळ धावत्या गाडीतून फेकून दिलं. इतर प्रवाशांच्या मदतीनं त्यांना रुग्णालयात दाखल करण्यात आलं. रुग्णालयात नेतानाच जुनैदचा मृत्यू झाला, अशी माहिती या मारहाणीत जखमी झालेल्या 23 वर्षांच्या शाकिरने दिली.

असे आहे प्रकरण?
वल्लभगड येथील खंदावली गावातील जुनैद, हाशिम, शाकिर मोहसिन आणि मोईन हे गुरुवारी रात्री उशिरा ईदनिमित्त खरेदी करून दिल्लीहून परतत होते. तुघलकाबाद स्थानकात चार जण पॅसेंजर गाडीत चढले. बसण्याच्या जागेवरून त्यांनी या चौघांशी वाद घातला. मोहसिन आणि इतरांनी त्यांना विरोध केला. त्या तरुणांनी बीफ बाळगल्याचा आरोप करत चौघांनाही मारहाण करण्यास सुरुवात केली. गाडीत बसलेले अन्य तरुणही एकत्र आले आणि त्यांनीही मारहाण करण्यास सुरुवात केली. दोघांनी चाकूनं मोहसिन, जुनैद, हाशिम, मोईनवर वार केले. त्यात 15 वर्षांच्या जुनैदचा मृत्यू झाला. या प्रकरणी फरीदाबाद रेल्वे पोलिसांत तक्रार दाखल करण्यात आली आहे.