मॅग्नेटिक नव्हे, फ्रस्ट्रेटेड महाराष्ट्र

विखे पाटील यांनी भाजपवर डागली तोफ

शिर्डी : भाजप सरकारने मॅग्नेटिक महाराष्ट्र नव्हे, फ्रस्ट्रेटेड महाराष्ट्र घडवला, अशी टीका विधानसभेचे विरोधी पक्षनेते राधाकृष्ण विखे पाटील यांनी केली. लोणी येथे शिवजयंतीच्या कार्यक्रमानंतर विखे पाटील यांनी अनेक मुद्यांवरून राज्य सरकारवर टीकेची तोफ डागली.

भाजप नेतेसुद्धा नैराश्याने ग्रासलेले
मुंबईतील मॅग्नेटिक महाराष्ट्र परिषदेसंदर्भातील प्रश्‍नाला उत्तर देताना विखे पाटील म्हणाले, राज्यात सध्या निराशेचे वातावरण आहे. शेतकरी, व्यापारी, कामगार, तरुण अशा सर्व घटकांमध्ये कमालीची निराशा आहे. एवढेच नव्हे तर भाजपचा मित्रपक्ष शिवसेना तसेच एकनाथ खडसे, आशिष देशमुखांसारखे भाजप नेतेसुद्धा नैराश्याने ग्रासलेले आहेत. भाजपच्या कार्यकाळात महाराष्ट्र फ्रस्ट्रेटेड झाल्याचे यापेक्षा अधिक उत्तम उदाहरण असू शकत नाही.

महापुरुषांच्या नावाचा भाजपाकडून वापर
मुंबईत आलेल्या पंतप्रधान नरेंद्र मोदी यांनी शिवस्मारकासंदर्भात वक्तव्य केले. मात्र यावेळी आंबेडकर स्मारक कधी होईल, याचा उल्लेख त्यांनी टाळला. केवळ राजकीय सोयीसाठी महापुरुषांच्या नावाचा भाजपाकडून वापर सुरु असून आपल्या जाहिरातीसाठी छत्रपतींचे होर्डिंग उतरवण्याचे काम सरकारने केले. आगामी निवडणुकीत जनता यांना सत्तेतून खाली उतरवेल, असा इशारा विखे यांनी दिला.

हे मुख्यमंत्र्यांचे अपयश
एक बाजूला मराठी साहित्य संमेलन बडोद्यात सुरु असताना, दुसरीकडे त्याच मराठी भाषेचा केंद्राकडून अवमान होतो, याचे सरकारने स्पष्टीकरण गरजेचे आहे. गेली तीन वर्षे राज्य सरकारकडून अभिजात दर्जा मिळण्यासाठी पाठपुरावा करण्याबाबत जनतेची दिशाभूल केली जात असून केंद्रीय गृहमंत्र्याचे वक्तव्य म्हणजे महाराष्ट्राच्या मुख्यमंत्र्यांचे अपयश आहे, अशी टीका विखे पाटील यांनी केली.