मॅरेथॉनद्वारे ‘ग्रीन सिटी’चा संदेश
पुणे । पेट्रोल, डिझेल आणि घरगुती गॅसच्या किमतीत होणारी वाढ याला सीएनजी आणि पीएनजी हा स्वस्त आणि पर्यावरणपूरक पर्याय आहे. दिल्लीमध्ये प्रदूषणाने धोक्याची पातळी ओलांडली असून तशीच वेळ पुण्यावर येऊ नये याकरीता पुण्यातील दुचाकीस्वारांनी सीएनजी कीट बसवून प्रदूषण नियंत्रण करण्यासाठी योगदान द्यावे, यासाठी महाराष्ट्र नॅचरल गॅस लिमिटेडतर्फे जनजागृती अभियान राबविण्यात आले. तब्बल 10 किलोमीटर धावून ‘ग्रीन सिटी’ चा संदेश यावेळी एमएनजीएलतर्फे देण्यात आला. म्हाळुंगे बालेवाडी येथील शिवछत्रपती क्रीडा संकुलापासून पुणे रनिंग बियाँड मायसेल्फ मॅरेथॉनमध्ये सीएनजी जनजागृती अभियानाला सुरुवात झाली. यावेळी अरविंद तांबेकर, संतोष सोनटक्के, मिलिंद नरहरशेट्टीवार, मिलिंद ढकुले आदींसह नागरिक सहभागी झाले होते.
महाराष्ट्र नॅचरल गॅस लिमिटेडचे 60 कर्मचारी या अभियानात सहभागी झाले होते. यावेळी सीएनजी कीट बसविलेल्या दुचाकीची टेस्ट ड्राईव्ह घेतली. सोनटक्के म्हणाले, केवळ दुचाकीच नाही तर चारचाकी वाहने, बसेस यामध्ये देखील सीएनजीचा वापर करता येतो. दुचाकींना सीएनजी कीट बसविण्याकरीता एमएनजीएल आणि बँक ऑफ महाराष्ट्राच्या एकत्रित प्रयत्नातून 85 टक्के वित्तपुरवठा देखील करण्यात येत आहे.