मेट्रो निगडीपर्यंत नेण्याबाबत केंद्रीय शहरी विकास मंत्री सकारात्क

पिंपरी-चिंचवड : पुणे मेट्रो पहिल्याच टप्यात निगडीपर्यंत नेण्याची मागणी शिवसेना खासदार श्रीरंग बारणे यांनी केंद्रीय शहरी विकास मंत्री हरदीपसिंग पुरी यांच्याकडे केली आहे. पुरी यांनी महापालिका सर्वाधिक आर्थिक सहभाग उचलण्यास तयार असेल तर पिंपरी ते निगडीपर्यंतच्या मेट्रो मार्गाला तत्काळ मंजुरी दिली जाईल, असे सांगितले. त्यामुळे पुणे मेट्रो पहिल्याच टप्यांत निगडीपर्यंत धावण्याची शक्यता आहे. याबाबत पुरी यांना निवेदन दिले आहे.

केंद्र सरकारने अर्थसंकल्पात तरतूद करावी
केंद्र सरकारच्या वतीने पुणे महानगर क्षेत्रातील सार्वजनिक व्यवस्था सक्षम करण्याच्या दृष्टीने महापालिका क्षेत्रातील मेट्रो रेल्वे कार्यान्वित करण्याचा निर्णय राज्य शासनाने पुणे मेट्रो रेल्वे प्रकल्पातील मार्ग क्र. 1 स्वारगेट ते पिंपरीला मान्यता दिली आहे. पहिल्या टप्यामध्येच निगडी भक्ती-शक्ती चौकपर्यंत मेट्रो सुरु व्हावी, हि पिंपरी-चिंचवड मधील नागरिकांची मागणी आहे. या मागणीचा विचार करून 29 ऑक्टोबर 2013 च्या महाराष्ट्र शासन निर्णयानुसार पुणे मेट्रो रेल्वे प्रकल्पाने सादर केलेला प्रस्तावाला राज्य सरकारने मंजुरी दिली आहे. सदरचा प्रस्ताव केंद्र सरकारकडे 2 सप्टेंबर 2014 ला मंजुरीसाठी पाठवला आहे. या प्रस्तावास केंद्र सरकार कडून मंजुरी मिळावी. केंद्र सरकारने या प्रकल्पासाठी आर्थिक निधीची तरतूद येत्या अर्थसंकल्पात करावी अशा अशी मागणी खासदार बारणे यांनी केली आहे.

माझा अनेक दिवसांपासून पाठपुरावा
बारणे म्हणाले, स्वारगेट ते निगडी भक्ती-शक्ती चौक पर्यंत मेट्रो रेल्वे सेवा करण्यासाठी मी अनेक दिवस पाठपुरावा करीत आहे. या संदर्भात या अगोदरही लोकसभेमध्ये प्रश्‍न उपस्थित करून संबंधीत मंत्रालयाला पत्र व्यवहार केला आहे. त्याचबरोबर राज्याचे मुख्यमंत्री व पिंपरी-चिंचवड महापालिका आयुक्तांना पत्र पाठवून प्रकल्पाचा खर्च उचलण्याची मागणी केली आहे. महाराष्ट्र शासनाने 29 ऑक्टोबर 2013 मध्ये स्वारगेट ते निगडी भक्ती-शक्ती चौक या भागाला मंजुरी दिली आहे. पिंपरी ते निगडी या वाढीव मेट्रो रेल्वे मार्गाला होणारा खर्च कोणी करायचा त्यामध्ये महाराष्ट्र शासन, पिंपरी-चिंचवड महापालिका व केंद्र सरकार आपला किती आर्थिक सहभाग देणार यावर चर्चा सुरु आहे. पालिका या प्रकल्पासाठी खर्च करण्यास तयार असल्यास निगडी भक्ती-शक्ती पर्यंत मेट्रो रेल्वे मंजुरीस केंद्र सरकारच्या वतीने तत्काळ मंजुरी मिळणार आहे.

महापालिकेची तयारी हवी
राज्य सरकार व महापालिका सर्वाधिक आर्थिक सहभाग उचलण्यास तयार असेल. तर, पिंपरी ते निगडी भक्ती शक्ती चौकापर्यंतच्या मेट्रो मार्गाला तत्काळ मंजुरी दिली जाईल. तसेच या मार्गाचा डी.पी.आर. बनविण्याच्या सूचना संबंधीत विभागाला दिल्या जातील. केंद्र सरकारच्या वतीने पुणे ते निगडी मेट्रो रेल्वेच्या प्रस्तावास मंजुरी देण्यास केंद्रीय शहरी विकास मंत्री हरदीपसिंग पुरी यांनी सहमती दर्शवल्याचे खासदार बारणे यांनी सांगितले.