मेट्रो पहिल्या टप्प्यात निगडीपर्यंत नेणारच

आमदार महेश लांडगे यांनी व्यक्त केला विश्‍वास

पिंपरी : पुणे मेट्रो पहिल्याच टप्प्यात निगडीपर्यंत धावणार आहे. त्यासाठी सर्व स्तरांवर प्रयत्न करण्यात येणार आहेत. सध्या मेट्रो पिंपरी पर्यंत येणार असून पुढील मार्ग वाढविण्यासाठी येत असलेल्या नेमक्या अडचणी जाणून त्यावर उपाय काढून पिंपरी ते निगडी पर्यंतच्या मेट्रो कामाला हिरवा कंदील लवकरच दाखवण्यात येईल, असे मत भोसरी विधानसभा मतदार संघाचे आमदार महेश लांडगे यांनी व्यक्त केले. ेपिंपरी येथील उपोषणाला त्यांनी पाठिंबा दिला, उपोषणकर्त्यांशी चर्चा करताना ते बोलत होते. यावेळी विविध संघटनांचे पदाधिकारी व कार्यकर्ते उपस्थित होते.

जूनपर्यंत डीपीआर
लांडगे म्हणाले, बजेट सत्रामध्ये पहिल्या टप्प्यात मेट्रोमार्ग लांबवण्याचा मुद्दा मांडणार आहे. महापालिकेकडून पिंपरी ते निगडी व नाशिक फाटा ते चाकण या वाढीव मेट्रो मार्गाचा डीपीआर तयार करण्यास मेट्रोला सांगितले आहे. जून, 2018 पर्यंत हे डीपीआर चे काम पूर्ण होईल. पिंपरी ते निगडी आणि नाशिक फाटा ते चाकण या मार्गावर मेट्रो पहिल्या टप्प्यात होणे गरजेचे असून त्याचा पाठपुरावा करणार आहे. वाढीव मार्गासाठी वाढीव निधीची आवश्यकता भासणार आहे. त्यासाठी शहरातील मोठ्या उद्योगांकडे त्यांच्या सीएसआर मधून निधी उभा करण्यासाठी देखील प्रयत्न करण्यात येणार आहेत.

ही नागरिकांची मागणी
पहिल्याच टप्प्यात निगडीपर्यंत मेट्रो होणे गरजेचे आहे. मेट्रो निगडीपर्यंत नेण्यासाठी सर्व स्तरांवर पाठपुरावा करणार आहे. हे केवळ आश्‍वासन नसून याबाबत ठोस पावले उचलली जाणार आहेत. निगडीपर्यंत मेट्रो व्हावी हा राजकीय मुद्दा नाही. ही नागरिकांची मागणी आहे. नागरिकांच्या मागण्यांचा सकारात्मक विचार करणे हे प्रत्येक लोकप्रतिनिधी तसेच प्रशासनाचे प्रथम कर्तव्य आहे. त्यामुळे मेट्रो पहिल्या टप्प्यात निगडीपर्यंत धावेल, असा ठाम विश्‍वास देखील त्यांनी यावेळी व्यक्त केला.

नागरिकांना पुन्हा रस्त्यावर येऊ देणार नाही
आज (रविवार) विविध संघटनांच्या माध्यमातून करण्यात आलेले लाक्षणिक उपोषण हे अखेरचे उपोषण असेल, यानंतर नागरिकांना मेट्रो निगडीपर्यंत होण्याच्या मागणीसाठी रस्त्यावर यावे लागणार नाही. पुणे मेट्रो पहिल्याच टप्प्यात निगडीपर्यंत धावेल, असे आमदार महेश लांडगे म्हणाले.