मेथीची भाजी खाल्ल्याने एकाच कुटुंबातील सात जणांना विषबाधा; एकाचा मृत्यू

नांदेड : मेथीची भाजी खाल्ल्याने एकाच कुटुंबातील सात जणांना विषबाधा झाल्याची घटना घडली असून यातील एकाचा उपचारा दरम्यान मृत्यू झाला आहे. सदरील घटना उमरी तालुक्यात घडली.यातील उर्वरित सहा जणांना पुढील उपचारासाठी नांदेडमधील रुग्णालयात हलवण्यात आले आहे. कोंडीबा गंगाराम कदम (वय ६५वर्ष) असे मृत व्यक्तीचे नाव आहे.

उमरी तालुक्यातील कळगाव येथे कोंडीबा गंगाराम कदम यांच्या घरी गुरुवारी सकाळी जेवणात मेथीची भाजी केली होती. जेवणानंतर घरातील सर्वच सदस्यांनी पोटदुखीचा त्रास सुरु झाल्याने सर्वांना रुग्णालयात नेण्यात आले. प्राथमिक उपचारानंतर सहा जणांना घरी पाठवण्यात आले. तर कोंडीबा कदम यांची प्रकृती खालावल्याने त्यांना रुग्णालयात दाखल करण्यात आले. गुरुवारी संध्याकाळी उपचारादरम्यान त्यांचा मृत्यू झाला.