मेहता, अडवाणी सीसीआय स्नूकर स्पर्धेत झुंजणार

मुंबई । आदित्य मेहता आणि पंकज अडवाणी ही भारतीय स्नूकरमधील दोन दिग्गज नावे. मात्र हे दोघेही घरच्या मैदानात एकमेकांसमोर उभे राहिले तर चाहत्यांना या महान खेळाडूंचा खेळ याचि देही याचि डोळा पाहण्याची अनोखी संधी मिळेल. 1 फेब्रुवारीपासून सीसीआयच्या विल्सन जोन्स बिलियर्डस रूममध्ये रंगणार्‍या सीसीआय ओपन स्नूकर अजिंक्यपद स्पर्धेत आदित्य आणि पंकज अडवाणी विजेतेपदासाठी झुंजणार आहेत. देशातील अव्वल स्नूकरपटू सहभागी होणार असल्यामुळे या स्पर्धेला क्लॅश ऑफ टायटन्स असे संबोधले जात आहे.

भारतातील अव्वल आठ खेळाडू या स्पर्धेत सहभागी होणार आहेत. नुकताच राष्ट्रीय विजेता ठरलेला चंडीगढचा सुमित तलवार, उपविजेता मलकीत सिंग तसंच दोन वेळा आशियाई स्नूकर चॅम्पियन ठरलेला यासिन मर्चंट, माजी राष्ट्रीय विजेता सोनिक मुलतानी, मुंबईस्थित आदित्य मेहता, पंकज अडवाणी यांसारखे स्नूकरपटू या स्पर्धेत एकमेकांशी झुंजतील. या स्पर्धेतील विजेत्याला दोन लाखांचे तर उपविजेत्याला 1.30 लाख रुपयांचे पारितोषिक देऊन गौरवण्यात येणार आहे. उपांत्य फेरीत पराभूत होणार्‍यांना प्रत्येकी 75 हजार रुपये देण्यात येतील. उपांत्यपूर्व फेरीत मजल मारणार्‍यांना 40 हजार रुपयांचा लाभ होईल. स्पर्धेदरम्यान 147 गुणांचा ब्रेक लगावणार्‍यांसाठी 1.47 लाख रुपयांची विशेष बक्षिसे देण्यात येतील. त्याचबरोबर सर्वाधिक गुणांचा ब्रेक लगावणार्‍याला 25 हजार रुपयांचे इनाम देण्यात येईल.