मोकाट कुत्र्यांचा चार जणांना चावा

जळगाव : सध्या भटक्या पिसाळलेल्या कुत्र्यांनी उच्छाद मांडला असून शनिवारी चार जणांना चावा घेतला. या चौघांवर जिल्हा सामान्य रुग्णालयात उपचार करण्यात आले. शहरासह तालुकाभरात झुंडीने भटके कुत्रे स्वैरपणे उच्छाद मांडत असतात. अनेकवेळा कुत्रे आडवा आल्याने गाडी पडून दुचाकीचालकांना किरकोळ जखमा होण्याचे प्रकार घडत आहेत.

शहरात मोकाट कुत्र्यांच्या संख्येत वाढ होत आहे. मोकाट कुत्र्यांनी शहरासह जिल्ह्यातील चार जणांना चावा घेत जखमी केले. त्यात पियुष पाटील वय-18 रा. शिवकॉलनी, शंकर महादु वराडे वय-75 रा. तारखेडा ता. पाचोरा, विजय कुमार वय-40 रा. प्रिंप्राळा, मोतीलाल पाटील वय-45 रा. शाहुनगर या जखमींचा समावेश आहे.

या मोकाट कुत्र्यांच्या चावा घेण्याच्या घटनांमध्ये वाढ होत असल्याने लहान मुलांना घराच्या अंगणात देखील खेळण्यास पालकवर्ग पाठवण्यास घाबरत आहे. भटक्या कुत्र्यांचा कायमस्वरूपी बंदोबस्त करण्याची मागणी पुढे येत असली तरी या भटक्या कुत्र्यांना आवरणार कोण? या प्रश्‍नाचे उत्तर मात्र अद्याप सापडलेले नाही.