मोकाट कुत्र्यांच्या बंदोबस्तासाठी ‘लाल पाण्याच्या बाटलीचा पर्याय’

रहिवाशांनी काढली नामी शक्कल : नगरपंचायतीने कुत्र्यांचा करावा बंदोबस्त

मुक्ताईनगर- शहरातील गोदावरी नगर परीसरात मोकाट कुत्र्यांच्या रात्री-बेरात्री सुरू असलेल्या उपद्रव सुरू असल्याने तसेच कुत्र्यांच्या भुंकण्यामुळे नागरीक परेशान झाले होते. कुत्र्यांचा बंदोबस्त करण्यासाठी नामी शक्कल लढवण्यात आली असून कुत्र्यांना हुसकावून लावण्यासाठी लालभडक पाण्याच्या बाटल्या घराच्या कंपाऊंडच्या आणि परीसरात ठेवण्यात आल्याने काही प्रमाणात मोकाट कुत्र्यांच्या त्रासापासून दिलासा मिळाला आहे.

कुंकवाच्या पाण्यामुळे मनस्ताप झाला कमी
गल्ली गल्लीबोळातील कुत्र्यांना वैतागलेल्या नागरीकांनी कुत्र्यांना हुसकावून लावण्यासाठी मिनरल वॉटरच्या रीकाम्या बाटल्यांमध्ये पाणी घेऊन त्यात कुंकू मिसळल्यानंतर लालभडक रंग आल्यानंतर ही लाल रंगाची बाटली घराच्या फाटकाजवळ आणि कंपाऊंडला लावण्यात आली शिवाय घराजवळील पटांगणात आणि झाडालगत कुत्र्यांनी घाण करू नये म्हणून ठेवण्यात आल्यानंतर कुत्री भटकत नसल्याने नागरीकांनी संपूर्ण शहरातच हा प्रयोग राबविण्यास सुरुवात केली आहे. या प्रयोगामुळे गोदावरी नगर भागातील बहुसंख्य घराबाहेर कंपाउंड व घराच्या फाटकाला या लाल बाटल्या लावेल्या दिसून येत आहे. घराजवळ वाळूचा गंज पडला असेल तर मोकाट कुत्र्यांचा वावर अधिक असतो आणि कुत्रे येथे घाण ही करतात. अशात वाळूच्या गंजावर या बाटल्या दर्शनी बाजूस रोवल्याचे ही चित्र आहे तर अगदी मंदिराच्या ओट्यावर ही या पाण्याच्या बाटल्या ठेवण्यात आल्या आहेत.

लाल रंगाची तीव्रता कमी होताच पुन्हा मनस्ताप
कुंकू आणि पाण्याच्या मिश्रणाच्या नामी शक्कलमागे अंधश्रद्धा किंवा वैज्ञानिक दृष्टिकोन नसला तरी लाल भडक रंगाच्या पाण्याच्या बाटल्या पाहून कुत्रे दचकतात. नवीन काह तरी दिसतेय म्हणून कुत्रे घराजवळ फिरकत नाही यातूनच मोकाट कुत्र्यांच्या त्रासाला वैतागलेल्या नागरीकांना दिलासा मिळाल्याचे दिसून आले. अर्थात कालांतराने या लालरंगाच्या पाण्याच्या बाटल्यांमधील कलर उन्हामुळे कमी होतो तसेच या बाटल्यांची सवय पडल्यानंतर कुत्र्यांचा वावर परत सुरू होतो, असाही एक मतप्रवाह आहे.