मोदींनी महाराष्ट्राची थट्टा केली-उध्दव ठाकरे

अहमदनगर – शिवसेना पक्षप्रमुख उद्धव ठाकरे आज अहमदनगर दौऱ्यावर आहेत. लोकसभा निवडणूक स्वबळावर लढवण्यासाठी उद्धव ठाकरे महाराष्ट्रातील सर्व ४८ लोकसभा मतदार संघात जाणार आहे. याची सुरुवात आज शिर्डीतून झाली आहे. यावेळी त्यांनी उपस्थितांना संबोधित करताना भाजपासहीत पंतप्रधान नरेंद्र मोदी यांच्यावर निशाणा साधला आहे. मोदी अहमदनगरला आले असता त्यांनी मराठीत उपस्थितांशी संवाद साधला. ते मराठीत बोलले. कसे काय, बरे आहे का ?असे विचारून त्यांनी महाराष्ट्राची थट्टा केली, अशी टीका उद्धव ठाकरे यांनी पंतप्रधान नरेंद्र मोदी यांच्यावर केली.

मोदींनी शिर्डीत येऊन साईबाबांकडून लोकांसाठी काही मागण्याऐवजी स्वत:साठी सर्व काही मागितले.

भाजप सरकार खोटारडे 

लाचारी आमच्या रक्तात नाही. तुमच्याकडून आम्हाला महाराष्ट्राची अन देशाची सत्ता हवी आहे. सगळीकडे जाहिरातींचा बोलबाला आहे. पंतप्रधान नरेंद्र मोदी मराठीत बोलण्याचे नाटक करतात. ही केवळ जुमलेबाजी आहे. राम मंदिरासाठी किती दिवस वाट पाहायचे. अनेक दिवसांपासून राममंदिरासाठी शिवसेना लढत आहे. आम्हाला पाणी देत असाल, दुधाला भाव देत असाल तर ५०० वर्षे सत्ता देऊ. भाजपा सरकार खोटे बोलत आहे. खोटे बोलूनच त्यांनी सत्ता मिळवली. मंदिर नहीं बनायेंगे असे एकदाचे सांगून टाका, असेही ठाकरे म्हणाले.

दरम्यान, मेळाव्यामध्ये शिवसैनिकांना संबोधित करण्यापूर्वी उद्धव ठाकरे यांनी शिर्डी मंदिराचे सहकुटुंब दर्शन घेतले. यावेळी साई संस्थानच्या वतीने ठाकरे कुटुंबीयांचा सन्मान करण्यात आला. साईबाबांचे दर्शन घेऊन उद्धव ठाकरे यांनी महाराष्ट्र दौरा सुरू केला. या दौ-यात ठाकरे राज्यातील ४८ लोकसभा मतदारसंघ पिंजून काढणार आहे. आज पहिला शिवसैनिकांचा मेळावा शिर्डीत संपन्न झाला.