मोदी सरकारची गुंतवणूकदारांसाठी शुभवार्ता

नवी दिल्ली : मोदी सरकारनं लघु बचत योजनांसारख्या पब्लिक प्रोव्हिडेंट फंड (पीपीएफ), राष्ट्रीय बचत पत्र (एनएससी), सुकन्या समृद्धी योजना (एसएसवाय) तसंच पोस्ट ऑफिस टाईम डिपॉझिटच्या व्याजदरामध्ये वाढ करण्याचा निर्णय जाहीर केला आहे. बदललेले व्याजदर 1 ऑक्टोबर 2018 पासून 31 डिसेंबर 2018 पर्यंत लागू राहतील.

निश्चित मिळकतीच्या बचत योजनांमध्ये गुंतवणूक करणाऱ्या गुंतवणूकदारांसाठी हे लाभदायक ठरणार आहे. कारण या योजनांच्या व्याजदरात गेल्या दोन तिमाहीमध्ये कोणतीही वाढ करण्यात आलेली नाही. जानेवारी – मार्च 2018 च्या तिमाहीत सरकारनं या योजनांच्या व्याजदरांत कपात केली होती.

अर्थ मंत्रालयानं जारी केलेल्या एका परिपत्रकानुसार, वेगवेगळ्या बचत योजनांच्या व्याजदरांत 0.30 टक्क्यांपासून 0.40 टक्क्यांपर्यंत वाढ करण्यात आलीय. पाच वर्षांचं डिपॉझिट, सुकन्या समृद्धी योजना, पीपीएफ आणि पीपीएफ यांसारख्या इतर योजनांच्या व्याजदरांत 0.40 टक्क्यांची वाढ करण्यात आलीय. या दरवाढीनंतर पीपीएफ आणि एनएससीवर 8 टक्क्यांचं व्याज मिळेल. तर सुकन्या समृद्धी योजनेवर आता 8.5 टक्के आणि वरिष्ठ नागरिक बचत योजनेवर 8.7 टक्क्यांचं व्याज मिळेल. पोस्ट ऑफिस बचत खात्याच्या व्याजदरांत कोणतेही बदल करण्यात आलेले नाहीत आणि ते 4 टक्के राहील.