मोलकरणीने लंपास केले सव्वा लाखांचे दागिने

वाकड पोलिसांनी लावला 12 तासात छडा

वाकड : घरकाम करणार्‍या मोलकरणीने मालकांच्या परस्पर घरातील सव्वा लाख रुपये किमतीचे सोन्याचे दागिने लंपास केले. हा प्रकार गुरुवारी (दि. 7) वाकड परिसरात घडला. वाकड पोलिसांनी शिताफीने तपास करत आरोपी मोलकरणीला अटक केली आहे. सनी मोहनलाल अचरा (रा. वाकड) यांनी याप्रकरणी वाकड पोलीस ठाण्यात फिर्याद दिली. त्यानुसार शिल्पा सुहास चव्हाण या मोलकरणीविरोधात गुन्हा दाखल करण्यात आला आहे.

घरमालक होते रुग्णालयात
पोलिसांनी दिलेल्या माहितीनुसार, सनी यांची आई आजारी असल्याने मागील काही दिवसांपासून सनी आणि त्यांचे वडील रुग्णालयात असतात. त्यांनी घराची चावी त्यांच्या शेजारी राहणार्‍या कविता शर्मा यांच्याकडे दिली. दरम्यान घराची स्वच्छता करण्यासाठी शिल्पा चव्हाण गुरुवारी सनी यांच्या घरी आली. तिने घरकाम करत असताना घरातील कपाटातून 40 ग्रॅम वजनाच्या सोन्याच्या दोन बांगड्या आणि 4 हजार 700 रुपये रोख रक्कम असा एकूण 1 लाख 24 हजार 700 रुपयांचा ऐवज चोरून नेला. रात्री सनी घरी आल्यानंतर चोरीचा प्रकार उघडकीस आला. त्यांनी वाकड पोलीस ठाण्यात तक्रार दिली.

तपास पथकातील कर्मचारी
वाकड पोलिसांनी शिताफीने तपास करत 12 तासात चोरीच्या गुन्ह्याचा छडा लावला. घरकाम करणारी मोलकरीण शिल्पा चव्हाण या महिलेला ताब्यात घेऊन तिच्याकडे कौशल्यपूर्वक विचारपूस केली असता तिनेच ही चोरी केल्याचे कबुल केले. ही कामगिरी वरिष्ठ पोलीस निरीक्षक सतीश माने, पोलीस उपनिरीक्षक हरीश माने, तपास पथकातील पोलीस कर्मचारी अश्‍विनी शिंदे, शाम बाबा, नितीन गेंगजे, अशोक दुधवणे, विक्रांत गायकवाड, प्रमोद कदम, विक्रम कुदळ, विजय गंभीर, मधुकर चव्हाण, बिभीषण कन्हेरकर, अनिल महाजन, सनी जोंधळे, महंमद नदाफ, धनराज किरनाळे, दादा पवार यांच्या पथकाने केली.