यंदा वृक्षारोपण करण्यासाठी दीड कोटींची रोपे खरेदी

पिंपरी-पिंपरी-चिंचवड महापालिकेच्या उद्यान विभागामार्फत दरवर्षी पावसाळ्यापूर्वी वृक्षारोपण केले जाते. यंदा देखील वृक्षारोपण करण्यासाठी दीड कोटी रुपयांची रोपे खरेदी केली जाणार आहेत. मोठी रोपे पुरविण्याचे काम मे. न्यू गार्डन गुरुज फार्म अॅन्ड नर्सरी या ठेकेदाराला देण्यात आले आहे. याबाबतच्या प्रस्तावाला आज झालेल्या स्थायी समितीच्या बैठकीत आयत्यावेळी मान्यता देण्यात आली.

पिंपरी-चिंचवड महापालिकेच्या उद्यान, वृक्षसंवर्धन विभागामार्फत दरवर्षी पावसाळ्यापूर्वी वृक्षारोपण केले जाते. यंदा 60 हजार रोपे लावण्याचे नियोजन केले आहे. त्यामध्ये रस्त्याचे कडेने, मोकळ्या जागा, स्मशानभूमी, दफनभूमी, मैदाने, शाळा, पाण्याच्या टाकीच्या कडेने, धार्मिक ठिकाणी, मंडई इत्यादी ठिकाणी 12 हजार 303 रोपे, विकसित उद्याने, विकसनशील उद्याने 5205, रेल्वेलाईनच्या कडेने मेट्रोमार्फत चार हजार, मिलिटरी हद्दीमध्ये 30 हजार, रोपवाटीकेमधून विक्री व वाटप 6492, हाऊसिंग सोसायटी दोन हजार अशी 60 हजार रोपांची लागवड करण्याचे नियोजन केले आहे.

रोपे खरेदीकरण्यासाठी पालिकेने निविदा मागविल्या होत्या. मे. न्यू.गार्डन गुरुज फार्म अॅन्ड नर्सरी, मे.निसर्ग लण्डस्केप सर्व्हीसेस आणि मे. बी.व्ही.जी इंडिया लिमिटेड असा तीन निविदा पालिकेकडे प्राप्त झाल्या होत्या. त्यापैकी मे. न्यू.गार्डन गुरुज फार्म अॅन्ड नर्सरी यांची निविदा 3.50 टक्के सर्वात कमी दराची आहे. त्यामुळे स्वीकृत करण्यात आली आहे. त्यामुळे त्यांना मोठी रोपे पुरवून लागवड करुन एक वर्ष देखभाल करण्यासाठी एक कोटी 36 लाख 90 हजार 162 रुपये देण्यात येणार आहेत. याबाबतच्या प्रस्तावाला स्थायी समितीने आयत्यावेळी मान्यता दिली. तसेच दोन मीटर उंचीची रोपे खरेदी करण्यासाठी याच ठेकेदाराला 31 लाख 42 हजार रुपये देण्यात येणार असून याबाबतच्या प्रस्तावाला देखील स्थायीने मान्यता दिली.