यावलला आढावा बैठकीत पाणीपुरवठा अधिकारी धारेवर

आमदार चंद्रकांत सोनवणे यांनी शेलक्या भाषेत सुनावले खडे बोल

यावल- तालुका दुष्काळग्रस्त असून ग्रामीण भागातील पाणीटंचाई संदर्भातील प्रत्यक्ष आराखड्याच्या बाबतीत तुम्हाला जर बैठकीत योग्य उत्तर देत येता नसतील तर तुम्ही प्रत्यक्षात काम कसे करतात ? आरखडा सादर करताना कूपनलिकेचे 200 फुटापर्यंत प्रस्ताव तुम्ही पाठवले मात्र प्रत्यक्षात मंत्री महोदयांनी 400 फूटावर पाणी लागेल म्हणून चारशे फुटाला मान्यता दिली आहे. एवढं तुम्हाला समजत नाही का ? अशा शब्दात चोपडा आमदार प्रा. चंद्रकांत सोनवणे यांनी ग्रामीण पाणीपुरवठाच्या अधिकार्‍यांना शिवसेना स्टाईलमध्ये शेलकी भाषेत खडे बोल सुनावले. त्यांच्या प्रश्नांची उत्तरे देखील अधिकार्‍यांना देता आली नाही. शनिवारी सर्व विभागाच्या आढावा समितीच्या बैठकीत तहसील कार्यालयात ते बोलत होते.

पाण्याचे निकष न तपासताच बनवला आराखडा : आमदार संतप्त
तहसील कार्यालयात शनिवारी चोपडा आमदार प्रा.चंद्रकांत सोनवणे यांनी सर्व विभागाची आढावा बैठक घेतली. तालुक्यात सद्या दुष्काळ असल्याने पाणीटंचाई संर्दभात ग्रामीण पाणीपुरवठा विभागाच्या उपअभियंता एस. एम. मोरे यांच्या कडून तालुक्यातील टंचाई संदर्भातील आराखडा कसा आहे ? या बाबत माहिती विचारली असता मोरे यांनी सहा गावात सात कुपनलिका व एक विहिर खोेली करण मंजूर असल्याचे सांगितले. तेव्हा आमदार प्रा. सोनवणे यांनी या गावात आराखडा तयार करतांना कशा प्रकारे निकष लावले? गावात पाण्याची स्थिती कशी? त्या गावात सदरील कामे कधी सुरू होतील? अशी माहिती विचारली असता मोरे यांना उत्तरं देता आली नाही. तेव्हा आमदारांनी त्यांचा चांगलाचंं समाचार घेतला. दुष्काळ असल्याने काम लवकर सुरू का झाली नाही ? तालुक्यात अजुन कोणत्या पेयजल योजना सुरू आहेत व त्यांची सध्याची स्थिती काय? यावर देखील अधिकारी मोरे निरूत्तर झाले. कुपनलिकेचे प्रस्ताव पाठवलेे ते देखील मोरे यांनी 200 फुटापर्यंतचे पाठवले तेव्हा 200 फुटावर पाणी तरी लागेल का? असा प्रश्न आमदारांनी केला तेव्हा जर 200 फुटावर पाणी लागणारचं नाही तेव्हा तुम्ही असे प्रस्ताव पाठवताचं कशासाठी ? असा संतप्त सवाल त्यांनी केला. मंत्रीमहोदयांनी 400 फुटाची परवानगी दिली आहे याची साधी माहिती तुम्हाला नाही का ? असा सवाल केला तर दुष्काळात पाणी टंचाईची कामे या महिन्याअखेर पूर्ण करण्याच्या सुचना व विहिर अधिग्रहण आवश्यक्तता असल्यास त्याचे नियोजन करण्याचे त्यांनी बजावले.

यांची होती उपस्थिती
या बैठकीत तहसीलदार कुंदन हिरे, पोलिस निरीक्षक डी.के.परदेशी, गटविकास अधिकारी किशोेर सपकाळे, सहाय्यक प्रकल्प अधिकारी सुनील चौधरी, विद्युत वितरणचे उपअभियंता दिलीप मराठे, लागवड अधिकारी प्रज्ञा वडमारे, एसटी आगाराचे एस.व्ही.भालेराव, सुर्यभान पाटील, सेनेचे शहराध्यक्ष जगदीश कवडीवालेे, शरद कोळी, गोेटू सोनवणे, आदिवासी सेेना प्रमुख हुसेन तडवींसह मोठ्या संख्येत पदाधिकारी, कार्यकर्ते उपस्थित होते.