यावल वनविभागाकडून 15 हजारांचे सागवान लाकूड जप्त

यावल- यावल वनविभागाच्या फिरत्या गस्ती पथकाने कोरपावली ते विरावली या भागात गस्त घालताना कच्च्या रोडालगत पाला-पाचोळ्यात लपवलेले सुमारे 15 हजार रुपये किंमतीचे सागवान लाकूड जप्त करीत अनोळखी आरोपींविरुद्ध गुन्हा दाखल केला. 4 रोजी पहाटे तीन वाजेच्या सुमारास ही कारवाई करण्यात आली. वनविभागाचे पथक मोहराळामार्गे कोरपावली ते विरावली या भागात गस्त घालत असताना गुप्त माहिती मिळाल्यानंतर त्यांनी 15 हजार रुपये किंमतीचे सागाचे 17 नग जप्त केले.

यांच्या पथकाने केली कारवाई
ही कारवाई यावल उपवनसंरक्षक यावल प्रकाश मोरणकर व धुळे विभागीय वन अधिकारी उमेश वावरे यांच्या मार्गदर्शनाखाली गस्ती पथकाचे वनक्षेत्रपाल एस.आर.पाटील, वनपाल सुनील आर.पाटील, वनरक्षक रवींद्र बी.पवार, वाहन चालक भरत बी.बाविस्कर, पोलिस कर्मचारी सचिन तडवी आदींच्या पथकाने केली.