या फोटोमुळे राहुल द्रविडवर कौतुकाचा पाऊस

नवी दिल्ली । भारतीय संघाचा माजी क्रिकेटपटू राहुल द्रविड जेवढा शांत आणि संयमी मैदानात असायचा, तेवढाच मैदानाबाहेरही आहे. 44 वर्षीय द्रविडचा एक फोटो सोशल मीडियावर व्हायरल होत असून, ज्यात तो आपल्या मुलांसोबत रांगेत उभा असल्याचे दिसत आहे. हा फोटो एका विज्ञान प्रदर्शनाच्या बाहेरचा असल्याचे म्हटले जात आहे. हजारो ट्विपल्सनी हा फोटो रिट्वीट केला आहे.

राहुल द्रविडने मे, 2003 मध्ये लग्न केले होते आणि त्याला दोन मुलं आहेत. एका ट्वीटर हॅण्डलवर शेअर केलेल्या फोटोमध्ये भारतीय संघाचा माजी कर्णधार राहुल द्रविड आपल्या मुलांसह रांगेत उभा आहे. या पोस्टमध्ये लिहिले आहे की, एका विज्ञान प्रदर्शनात आपल्या मुलांसोबत रांगेत उभा असलेला राहुल द्रविड कोणताही दिखावा नाही, पेज-3 अ‍ॅटिट्यूड नाही, सेलिब्रिटी असल्याचा गर्व नाही, इतकंच काय तर मी कोण आहे माहिताय का? अशी अधिकारवाणी भाषाही नाही. इतर सामान्य आई-वडिलांप्रमाणे रांगेत उभा आहे.