योजनांचा निधी मार्चअखेर खर्च करा
बारामती । शासनाच्या विविध योजना जिल्हा परिषद, पंचायत समितीमार्फत राबविण्यात येत असतात. या योजनांची अंमलबजावणी करण्याच्या कामाला गती देण्यात यावी. योजनांतर्गत मंजूर कामांकरीता निविदा प्रक्रिया तात्काळ पूर्ण करण्यात येवून मार्च 2018 अखेर संपूर्ण निधी खर्च करण्याच्या सूचना प्रांताधिकारी हेमंत निकम यांनी दिल्या. पंचायत समिती, बारामती येथील सभागृहात पंचायत समितीअंतर्गत विविध विभागांची कामकाज आढावा बैठक आयोजित करण्यात आली होती. याप्रसंगी ते बोलत होते. यावेळी पंचायत समिती सभापती संजय भोसले, उपसभापती शारदा खराडे, जिल्हा परिषद सदस्य भरत खैरे, प्रमोद काकडे, पंचायत समिती सदस्य राहुल भापकर, भारत गावडे, रोहित कोकरे, मेनका मगर, लीलाबाई गावडे, गट विकास अधिकारी प्रमोद काळे, पंचायत समितीचे विस्तार अधिकारी उपस्थित होते.
अडचणी जाणून घेऊन निराकरण
पंचायत समितीअंतर्गत बांधकाम, घरकुल योजना, कृषी, शिक्षण, छोटे पाटबंधारे, जलसंधारण विभागांच्या कामांचा आढावा घेण्यात आला. या विभागामार्फत पूर्ण व प्रगतीपथावर असलेल्या कामांसंदर्भात माहिती घेण्यात आली. योजनांच्या अंमलबजावणीसाठी येणार्या अडचणी जाणून घेऊन त्याचे निराकरण निकम यांनी यावेळी केले. जिल्हा परिषद व पंचायत समिती सदस्य यांनी आपल्या मतदार कार्यक्षेत्रात प्रस्तावित कामकाजावर चर्चा केली. काही आवश्यक बदल सुचवून कामांना गती देण्याची अपेक्षा व्यक्त केली. गटविकास अधिकारी श्री. काळे यांनी पंचायत समितीमार्फत राबविण्यात येणार्या योजनांविषयी माहिती दिली. तसेच जि. प. व पं. स. सदस्यांकडून प्राप्त सूचनांचे पालन करण्यात येवून त्याची अंमलबजावणी करण्यात येणार असल्याचे सांगितले.
100 टक्के वसुलीचे ग्रामविकास अधिकार्यांना टार्गेट
प्रांताधिकारी श्री. निकम यावेळी म्हणाले, तालुक्यात आमदार, खासदार फंडातून मंजूर झालेला निधी वेळेत खर्च झाला पाहिजे. पंचायत समितीचे विस्तार अधिकारी यांनी योजनांच्या अंमलबजावणीकरीता नियोजन करावे. तालुक्यातील ग्रामपंचायतींची घरपट्टी, पाणीपट्टी 100 टक्के वसुलीसाठी ग्रामविकास अधिकारी यांना टार्गेट देण्यात यावे. जास्त थकबाकी असेल तर त्यांना समान हप्ते बांधून देवून वसुली करण्यात यावी. पाणीपुरवठा विभागास टंचाई आराखडा तात्काळ सादर करण्याच्या सूचना दिल्या. टंचाई आराखड्यामध्ये टँकर बंद करण्याच्या दृष्टीने विहीरी, पाईपलाईन यांचा समावेश करावा. पाणीपुरवठ्याच्या छोट्या-छोट्या योजना कार्यान्वित करण्याच्या सूचना निकम यांनी दिल्या.