रहाणेला बाहेर बसावे लागणार?
नवी दिल्ली । दुखापतीतून सावरलेल्या केदार जाधवचे भारतीय संघात पुनरागमन झाले आहे. दक्षिण आफ्रिका दौर्‍यासाठी जाहीर करण्यात आलेल्या भारतीय एकदिवसीय संघात केदार जाधव आणि शार्दूल ठाकुरचे पुनरागमन झाले आहे. तर उमेश यादव आणि सलामीवीर केएल राहुलला संधी देण्यात आलेली नाही. फेब्रुवारी 2018 मध्ये भारत दक्षिण आफ्रिकेविरुद्ध सहा सामन्यांची वन डे मालिका खेळणार आहे. या संघामध्ये सलामीवीर शिखर धवन आणि रोहित शर्माचाही समावेश आहे. शिवाय अजिंक्य रहाणेलाही संधी देण्यात आली आहे. त्यामुळे सलामीवीर फलंदाज म्हणून अजिंक्य रहाणेला अंतिम 11 मध्ये खेळण्याची संधी मिळणार का, हा सर्वांसाठी मोठा प्रश्‍न आहे.
रोटेशनचा वापर केला तर संधी
रहाणेला तिसर्‍या क्रमांकावर खेळण्यासाठी पाठवायचे नाही, हे संघ व्यवस्थापन आणि कर्णधार विराट कोहलीने यापूर्वीच स्पष्ट केले आहे. अजिंक्य रहाणे सलामीवीर फलंदाज आहे. मात्र रोहित, धवनच्या उपस्थितीत त्याला बाहेर बसावे लागते. ही सलामीवीर जोडी अगोदरच फॉर्मात असल्यामुळे रोटेशन पॉलिसीचा वापर केला तरच रहाणेला संधी मिळणे शक्य आहे. अजिंक्य रहाणे तिसर्‍या क्रमांकाचा सलामीवीर फलंदाज असल्याचे यापूर्वी विराट म्हणाला होता. शिखर धवनच्या अनुपस्थितीत रहाणेने संधीचा फायदा घेत चार सामन्यात अर्धशतके ठोकले होते. ती मालिका भारताने 4-1 ने जिंकली होती. त्यानंतर न्यूझीलंडविरुद्धच्या मालिकेत धवनचे पुनरागमन झाल्याने रहाणेला पुन्हा बाहेर बसावे लागले. एकसारखे चार खेळाडू संघात असतात तेव्हा अशाच पद्धतीने संतुलन साधावे लागते आणि एकाला अंतिम अकरामधून बाहेर रहावंच लागते, असे विराटने न्यूझीलंडविरुद्धच्या एकदिवसीय मालिकेपूर्वी स्पष्ट केले होते. शिवाय रहाणे मधल्या फळीतील फलंदाज नसल्याचं सांगायलाही तो विसरला नाही.
दक्षिण आफ्रिका दौर्‍यासाठी भारतीय संघ
विराट कोहली (कर्णधार), रोहित शर्मा, शिखर धवन, अजिंक्य रहाणे, श्रेयस अय्यर, मनीष पांडे, केदार जाधव, दिनेश कार्तिक, महेंद्रसिंह धोनी (विकेटकीपर), हार्दिक पंड्या, अक्षर पटेल, कुलदीप यादव, यजुवेंद्र चहल, भुवनेश्‍वर कुमार, जसप्रीत बुमरा, मोहम्मद शमी, शार्दुल ठाकुर.