राजीव यांच्या मारेकर्‍यांना इंदिरा गांधींनीच पोसले
नवी दिल्ली । माजी पंतप्रधान राजीव गांधीं यांच्या पुण्यतिथीच्या दिवशी एलटीटीईच्या माजी कमांडरने एक खळबळजनक खुलासा केलाय. राजीव गांधी यांच्या मारेकर्‍यांवर त्यांच्या मातोश्री अर्थात माजी पंतप्रधान इंदिरा गांधी यांचा वरदहस्त होता, असा गौप्यस्फोट या कमांडरने केला आहे.
इंदिरा गांधींनीं प्रभाकरनवर वरदहस्त ठेवला होता का? याची नेहमीच चर्चा व्हायची. मात्र याविषयी कॅमेर्‍यासमोर बोलायला आजवर कुणीही धजावले नव्हते. आता प्रभाकरनचा विश्वासू समजल्या जाणार्‍या कुमारन पद्मनाथन यानेच एका वृत्तवाहिनीला दिलेल्या मुलाखतीत हा खुलासा केला आहे. सुरुवातीच्या काळात भारतानेच लिट्टेला पोसले आणि त्यावेळी इंदिरा गांधी भारताच्या पंतप्रधान होत्या. तामिळींना न्याय देण्याच्या नावाखाली इंदिरा गांधींनीच या दहशवादी संघटनेचं पालनपोषण केले आणि पुढे जाऊन याच संघटनेने इंदिरा गांधींचे पुत्र राजीव गांधी यांची हत्या केली.
लिट्टेच्या खातम्यानंतर कुमारनला मलेशियातून अटक करण्यात आली. तो केपी नावाने ओळखला जातो. केपीनेच लिट्टेमध्ये आत्मघाती बॉम्ब आणि पकडले गेल्यास सायनाईड कॅप्सूल खाण्याचे प्रशिक्शण दिले होते. सध्या केपी श्रीलंकेतल्या जाफनामध्ये अनाथ मुलांसाठी शाळा चालवतो.