राज्यभर निवासी डॉक्टरांचा संप

मुंबई : लोकांचा जीव वाचवणार्‍या डॉक्टरांना मारहाण होण्याचे प्रकार अद्याप थांबलेले नाहीत. धुळे येथील डॉक्टरांना झालेल्या मारहाणीनंतर मुंबई महापालिकेच्या शीव रुग्णालयात डॉक्टरांना मारहाणीचा प्रकार घडल्याने निवासी डॉक्टरांनी सामूहिक रजा आंदोलन सुरू केले आहे. हे रजा आंदोलन त्वरित मागे घेवुन डॉक्टर कामावर रुजू न झाल्यास नियमाप्रमाणे कारवाई करू, असा इशारा मुंबईचे महापौर विश्वनाथ महाडेश्वर यांनी दिला आहे.

शीव रुग्णालयातील डॉक्टरांबरोबर त्यांच्या मागण्याबाबत सोमवारी पालिका मुख्यालयात बैठक आयोजित करण्यात आली होती. या बैठकीला मुंबईचे महापौर विश्वनाथ महाडेश्वर, सभागृह नेते यशवंत जाधव, स्थायी समिती अध्यक्ष रमेश कोरगावकर, सुधार समिती अध्यक्ष बाळा नर, पालिका अतिरिक्त आयुक्त आय. ए. कुंदन, संचालक अविनाश सुपे इत्यादी मान्यवर उपस्थित होते.

यावेळी उपस्थित डॉक्टरांनी त्वरित सुरक्षा देण्याची मागणी केली. डॉक्टरांना काम करताना सुरक्षेसाठी शस्त्रधारी पोलीस द्यावेत, आलाराम लावावेत, पेशंट बरोबर वार्डमध्ये 2 नातेवाईक, इर्मन्जसी वार्डमध्ये 3 नातेवाईक येतील याची दक्षता घ्यावी. रुग्णाबरोबर मोठा घोळका येणार नाही यासाठी प्रशासनाने कारवाई करावी इत्यादी मागण्या करण्यात आल्या. आतापर्यंत दिलेली आश्वासने पूर्ण न झाल्याने आम्ही सामूहिक रजा घेतल्या आहेत. जोपर्यंत सुरक्षित वाटत नाही तोपर्यंत कामावर हजर होणार नसल्याची माहिती डॉ. नंदीश व शारन सोनवणे यांनी दिली.

दरम्यान, याबाबत बोलताना डॉक्टरांनी केलेल्या मागण्यांपैकी रुग्णाबरोबर दोन पास व घोळका येणार नाही याची दक्षता घेण्याच्या सूचना प्रशासनाला देण्यात आल्या आहेत. मुंबई पोलिसांशी बोलणे झाले असून शनिवारपर्यंत 400 व 1 एप्रिल पासून आणखी 300 असे एकूण 700 शस्त्रधारी पोलीस नियुक्त केले जाणार आहेत, दुप्पट खर्च करून हे पोलीस दिले जाणार आहेत असे महाडेश्वर यांनी सांगितले.

संपकरी डॉक्टरांवर मेस्मा अंतर्गत कारवाई करणार का याबाबत बोलताना डॉक्टरांच्या सामूहिक रजा मेस्मा असल्या तरी हा संपाचा प्रकार आहे. रुग्णांचे हाल होत आहेत, याची दखल या डॉक्टरांनी घ्यायला हवी. रुग्णांचे हाल होऊ नये म्हणून डॉक्टरांनी आपला संप मागे घ्यावा, अन्यथा डॉक्टरांवर कायदेशीर कारवाई केली जाईल, असा इशारा महापौर महाडेश्वर यांनी दिला आहे.