राणेंची पाहिली सभा कोल्हापुरात

8 डिसेंबरपासून पश्चिम महाराष्ट्राच्या दौर्‍यावर

कोल्हापूर : काँग्रेस पक्षाला सोडचिठ्ठी दिल्यानंतर ज्येष्ठ नेते नारायण राणे यांनी महाराष्ट्र स्वाभिमान पक्षाची स्थापना केली. आता पक्ष स्थापनेनंतर ते प्रथमच पश्चिम महाराष्ट्राच्या दौरावर येत आहेत. त्यांची पक्ष स्थापनेनंतर पहिलीच जाहीर सभा कोल्हापूरमध्ये होणार आहे, अशी माहिती महाराष्ट्र स्वाभिमान पक्षाचे कोल्हापूर जिल्हाध्यक्ष सचिन तोडकर यांनी दिली. राणे यांचे 8 डिसेंबर रोजी सकाळी 10 वाजून 15 मिनिटांनी खासगी हेलिकॉप्टरने कोल्हापूर विमानातळावर आगमन होणार आहे. कोल्हापुरात आगमन झाल्यानंतर ते सर्वप्रथम राजर्षी शाहू जन्मस्थळाला भेट देणार देवून त्यांच्या प्रतिमेला पुष्पहार अर्पण करतील. तेथून दौर्‍याची सुरुवात होणार आहे.

दसरा चौकात जाहीर सभा
नारायण राणे हे 8 डिसेंबर रोजी सकाळी 11 वाजता हॉटेल पंचशील येथे कोल्हापूर जिल्ह्यातील कार्यकर्त्यांशी गाठीभेटी आणि त्यांना मार्गदर्शन करणार आहेत. नंतर दुपारी 1 ते दुपारी 4 वाजेपर्यंत त्यांचा वेळ राखीव ठेवण्यात आला आहे. दुपारी 4 वाजता नारायण राणे यांची शासकीय विश्राम गृहावर पत्रकार परिषद आयोजित करण्यात आली आहे. सायंकाळी 6 वाजता येथील दसरा चौकात राणे यांची जाहीर सभा आयोजित करण्यात आली आहे. सभेला माजी खासदार नीलेश राणे यांची प्रमुख उपस्थिती असणार आहे. सभेला अशोक पाटील (तात्या), जयेश कदम, माजी आमदार सुरेश साळोखे, त्याचबरोबर महाराष्ट्रातील राजकीय नेते मंडळी उपस्थित राहणार आहेत. राणे यांनी आपल्या महाराष्ट्र स्वाभिमानी पक्षाच्या स्थापनेनंतर राज्यातील पहिलीच जाहीर सभा करवीरनिवासिनी आई अंबाबाईच्या कोल्हापुरात घेवून येथूनच संपूर्ण राज्यभरात पक्ष वाढीचे काम सुरु करण्याचा निर्णय राणे यांनी घेतला आहे.