राफेलबाबतचा कॅगचा अहवाल अधिवेशनात मांडण्यात येणार !

नवी दिल्ली-गेल्या काही महिन्यांपासून ज्या मुद्द्यांवरून काँग्रेस अध्यक्ष राहुल गांधी यांच्यासह विरोधक मोदी सरकारवर टीका करत आहे. त्या राफेल कराराबद्दल नियंत्रक व महालेखा परीक्षकांचा (कॅग) अहवाल संसदेच्या अर्थसंकल्पीय अधिवेशनात मांडण्यात येणार आहे. उद्यापासून राष्ट्रपतींच्या अभिभाषणाने संसदेच्या अर्थसंकल्पीय अधिवेशनाला सुरुवात होते आहे. शुक्रवारी, १ फेब्रुवारी रोजी अर्थमंत्री पियुष गोयल अंतरिम अर्थसंकल्प लोकसभेत सादर करतील. त्यानंतर कॅगचा अहवाल लोकसभेत पटलावर ठेवला जाणार आहे.

आगामी लोकसभा निवडणुकीच्या प्रचारात राहुल गांधी यांच्याकडून राफेल करारात भ्रष्टाचार झाल्याचा मुद्दा लावून धरला जाण्याची शक्यता आहे. त्यामुळे या प्रकरणात कॅगचा अहवाल अत्यंत महत्त्वाचा मानला जात आहे. कॅगच्या अहवालात या प्रकरणावर काय टिप्पणी करण्यात आली आहे. त्यावर विरोधकांच्या मुद्द्यांमध्ये कितपत तथ्य आहे, हे स्पष्ट होईल. या सर्व पार्श्वभूमीवर संसदेच्या अर्थसंकल्पीय अधिवेशनात राफेल प्रकरणी कॅगने दिलेला अहवाल संसदेत सादर केला जाईल.

दरम्यान, संसदेचे अर्थसंकल्पीय अधिवेशन सुरळीत पार पडावे, यासाठी लोकसभा अध्यक्ष सुमित्रा महाजन यांनी आज बुधवारी सर्वपक्षीय बैठक बोलावली आहे. तर राज्यसभेचे सभापती आणि उपराष्ट्रपती व्यंकय्या नायडू यांनी गुरुवारी राज्यसभेतील गटनेत्यांची बैठक बोलावली आहे.