रामदास कदमांचा खंडणीखोर टायपिस्ट अटकेत

मुंबई: पर्यावरण मंत्री आणि शिवसेना नेते रामदास कदम यांच्याकडे टायपिस्ट म्हणून काम करणार्‍या महेश सावंत याला पोलिसांकडून अटक करण्यात आली आहे. वाळू ठेकेदाराला धमकावून खंडणी मागितल्याचा सावंत याच्यावर आरोप ठेवण्यात आला आहे.

महेश सावंत यांनी दहा लाख रुपयांची खंडणी मागितल्याचा आरोप आहे. रामदास कदम यांच्या नावाचा गैरवापर करून विदर्भातील एका व्यावसायिकाला कारवाई टाळण्यासाठी खंडणी देण्याची मागणी सावंत याने केल्याचे सांगितले जात आहे.
विशेष म्हणजे रामदास कदम यांनीच महेश सावंत याला मलबार हिल पोलिसांच्या ताब्यात दिले आहे. गुरुवारी महेश सावंतविरोधात तक्रार दाखल करण्यात आल्यानंतर शुक्रवारी त्याला बेड्या ठोकण्यात आल्या होत्या.

दरम्यान, सावंत यांनी खंडणी मागितल्याची माहिती शिवसेना विभाग प्रमुखांनी कदम यांना दिली होती. त्यानंतर फोन टॅप करून कदम यांनी याविषयी माहिती मिळवली. मलबार हिल पोलिसांना बोलावून सावंतविरोधात पुरावे देण्यात आले. त्यानंतरच महेश सावंतला पोलिसांनी अटक केली.