रावेत : रावेत-वाल्हेकरवाडी या 34.5 मीटर रस्त्याच्या अर्धवट अवस्थेतील रस्त्याच्या रुंदीकरणासाठी आवश्यक असणार्या जागेचा ताबा घेण्यासाठी अडथळा ठरत असलेल्या कच्च्या आणि पक्क्या स्वरूपातील 74 घरांवर प्राधिकरण प्रशासनाने बुलडोझर फिरविला. बुधवारी सकाळी 9 वाजल्यापासून वाल्हेकरवाडी रावेत मार्गावरील छत्रपती शिवाजी चौक ते ओढ्यापर्यंतची घरे पोलीस बंदोबस्तात भुईसपाट केली. या घरांना प्राधिकरणाने 1 जानेवारीला अंतिम नोटिसा दिल्या होत्या. यामध्ये घरे खाली करण्यास सांगत घरांवर अंतिम लाल रेषांचे मार्किंग करण्यात आले होते.
तीन वर्षांपासून रखडले होते भूसंपादन
गेल्या दोन ते तीन वर्षांपासून महापालिका आणि नवनगर विकास प्राधिकरण यांच्या वादात भूसंपादना अभावी रावेत ते चिंचवड जुना जकात नाका या सहा पदरी मार्गावरील वाल्हेकरवाडी गावठाणापासून ओढ्यापर्यंतचे काम अर्धवट अवस्थेत आहे. हे काम पूर्ण करण्यासाठी प्राधिकरणाने कंबर कसली आहे. त्यासाठी आवश्यक असणार्या जागेचे भूसंपादन करण्यासाठी वाल्हेकरवाडी येथील सर्वे क्रमांक 115 ते 121 मधील 74 घरांना प्राधिकरणाने खाली करण्याच्या अंतिम नोटीस दिल्या होत्या. त्या अनुषंगाने प्राधिकरणाच्या अतिक्रमण विभागाने सर्वे क्रमांक 120 आणि 121 मधील बाधित घरांवर बुलडोझर फिरविला. यामध्ये 5 पक्की घरे आणि 69 तात्पुरत्या स्वरूपातील पत्रा शेड व कौलारू बैठ्या स्वरूपातील घरे काढून टाकण्यात आली आहेत.
महापालिका हद्दीत काम अपूर्ण
चिंचवड जकात नाका ते रावेत हा रस्ता वाल्हेकरवाडीमधून जात असून या रस्त्याचे काम आजही अपूर्णच आहे. हा रस्ता चिंचवड जुना जकात नाका येथून सुरवात होऊन पुढे औंधमार्गे येणारा बीआरटी रस्ता रावेत येथे मिळतो. पुण्यावरून मुंबईकडे जाणार्या लोकांसाठी हा एक चांगला मधला मार्ग आहे. या रस्त्यामुळे प्रवाशांचा वेळ आणि पैसा दोन्हीही वाचते. मात्र, या रस्त्याचे काम असे अर्धवट अवस्थेत आहे. नवनगर विकास प्राधिकरणातील हद्दीतील रस्त्याच्या कामाला सुरवात होवून 31 डिसेंबर 2014 रोजी पूर्ण झाले आहे. तेथून पुढील रस्त्यासाठी आवश्यक असणारे भूसंपादन महापालिके कडून न झाल्यामुळे अजूनही हा रस्ता वापरात नाही. या रस्त्याचा पूर्ण खर्च महानगरपालिका करणार होती; पण त्याची काही हद्द प्राधिकरणाच्या हद्दीत येत असल्यामुळे हा रस्ता प्राधिकरणाकडे सोपविण्यात आला. या रस्त्याची पूर्ण लांबी 3.15 किमी व रुंदी 34.5 मी. असून प्राधिकरणाच्या हद्दीतील 2.63 किमी लांबी आणि पूल बांधून पूर्ण झाले असून महानगरपालिकेच्या हद्दीतील वाल्हेकरवाडी येथील सुमारे 200 मीटर पेक्षा जास्त जागेच्या भूसंपादनाचे काम अपूर्ण राहिले आहे. त्यामुळे हा रस्ता खुला करण्यात आला नाही.
आता जबाबदारी महापालिकेची
रस्त्यासाठी जवळपास 37 कोटी रुपये खर्च अपेक्षित असून आतापर्यंत सुमारे 17 ते 18 कोटी रुपये खर्च झाला आहे प्राधिकरणाच्या हद्दीतील रस्ता पूर्ण झाला असून तो वापरण्यायोग्य आहे असेही जाहीर करण्यात आले आहे व प्राधिकरणाची जबाबदारी त्यांनी पार पडली आहे. आता महानगरपालिकेच्या जबाबदारी असल्यामुळे त्यांच्याकडून काम होण्याची प्रतीक्षा नागरिकांना लागून राहिली आहे. हा महानगरपालिकेच्या हद्दीतील रस्ता राहिल्यामुळे वाहनचालकांना व नागरिकांना नाहक त्रास सहन करावा लागत आहे. विकास आराखड्या नुसार रावेत ते चिंचवड जकात नाका मार्गावरील वाल्हेकरवाडी गावठाण ते नाल्यापर्यंत चा भाग नवनगर प्राधिकरणाच्या अखत्यारीत येतो तेथील भूसंपादन प्राधिकरणाच्या वतीने करण्यात येणार असून महापालिका रस्त्याच्या अर्धवट अवस्थेतील काम करणार आहे.