रावेर तालुक्यात विकासासाठी 258 कोटी मंजूर

आमदार हरीभाऊ जावळे यांची रावेरला पत्रकार परीषदेत माहिती

रावेर- रावेर तालुक्यात रस्ते, इमारती, सबस्टेशन यासह विविध विकासकामांचा झंजावात सुरू असून या कामांसाठी सुमारे 258 कोटी रुपये मंजूर झाले आहेत. यातील काही कामे झाली असून काही कामांना प्रत्यक्षात सुरुवात होणार आहे.त्यापैकी पाल-पिंपरूळ या रस्त्यासाठी 99 कोटी रुपये मंजूर झाले असून या कामांचा शुभारंभ सार्वजनिक बांधकाम मंत्री तथा पालकमंत्री चंद्रकांत पाटील यांच्या हस्ते करण्यात येणार असल्याची माहिती आमदार हरीभाऊ जावळे यांनी येथे पत्रकार परीषदेत दिली. शहरातील शासकीय विश्रामगृहावर शुक्रवारी त्यांनी पत्रकार परीषद घेतली.

यांची पत्रकार परीषदेस उपस्थिती
माजी शिक्षण सभापती सुरेश धनके, भाजपा जिल्हा उपाध्यक्ष पद्माकर महाजन, भाजपा तालुकाध्यक्ष सुनील पाटील, भाजपा सरचिटणीस विलास चौधरी, शहराध्यक्ष मनोज श्रावग, पंचायत समिती सदस्य जुम्मा तडवी, पी.के.महाजन, माजी शहराध्यक्ष उमेश महाजन, हरलाल कोळी, संदीप सावळे आदी भाजपा कार्यकर्ते पदाधिकारी उपस्थित होते.

आचारसंहितेपूर्वी होणार कामे
आमदार जावळे म्हणाले की, रावेर शहराची हद्दवाढ लवकरच मार्गी लागणार आहे. शहरात मंगल कार्यालयासाठी दोन कोटी 24 लाख मंजूर झाले आहेत तसेच भिकनगांव-पाल-पिंपरुळ रस्त्यासाठी 99 कोटी, आमोदा-पाल रस्त्यासाठी 45 लाख, पाल-कुसुंबा रस्त्यासाठी 30 लाख, अंकलेश्वर-बर्‍हाणपूर रस्त्यासाठी दिड कोटी, चिनावल-वडगाव रस्त्यासाठी 30 लाख, जिन्सी-मोरव्हाल रस्त्यासाठी 80 लाख, खिरोदा-चिनावल-बलवाडी रस्त्यासाठी अडीच कोटी, ऐनपूर-अजंदे रस्त्यासाठी एक कोटी 60 लाख, खिरोदा-फैजपूर रस्त्यासाठी पाच कोटी 33 लाख, पाल-मोरव्हाल रसलपूर एक कोटी 23 लाख, भोर-पुनखेडा-पातोंडी रस्त्यासाठी दोन कोटी 20 लाख, उटखेडा-चिनावल 58 लाख, भोकरी-जुनोने रस्त्यासाठी एक कोटी 87 लाख यासह मतदारसंघात 258 कोटीची कामे आचारसंहिता लागण्यापूर्वी सुरू होणार असल्याचे आमदार जावळे म्हणाले.