राष्ट्रवादीचे आमदार पांडुरंग बरोरांचा शिवसेनेत प्रवेश

मुंबई: ठाण्यातील राष्ट्रवादी काँग्रेसचे नेते आणि शहापूर विधानसभा मतदारसंघाचे आमदार पांडुरंग बरोरा यांनी काल आमदारकीचा राजीनामा दिला होता. त्यानंतर ते शिवसेनेत जाणार अशी चर्चा होती. दरम्यान आज त्यांनी शिवसेनेत प्रवेश केला. दादरमधील शिवसेना भवन येथे जाऊन शिवसेना पक्षप्रमुख उद्धव ठाकरेंच्या उपस्थिती त्यांनी शिवसेनेत प्रवेश केला. त्यावेळी, आदित्य ठाकरे, मंत्री एकनाथ शिंदे, यांसह शिवसेना आणि बरोरा यांचे कार्यकर्तेही उपस्थित होते.

बरोरा यांनी मंगळवारी विधानसभा अध्यक्षांकडे आपल्या आमदारकीचा राजीनामा दिला. त्यावेळीही, ठाण्याचे पालकमंत्री एकनाथ शिंदे बरोरा यांच्यासमवेत हजर होते. त्यामुळे आगामी विधानसभा निवडणुकीत शिवसेनेकडून बरोरा शहापूर मतदारसंघाचे उमेदवार असतील, हे जवळपास निश्चित झाले आहे.