रेल्वेकडून आचारसंहितेचे उल्लंघन? रेल्वे तिकिटावर मोदींचा फोटो

नवी दिल्ली: सध्या लोकसभा निवडणूक सुरु असल्याने आचारसंहिता लागू आहे. निवडणूक आयोग राजकीय पक्षांवर लक्ष ठेवून आहे. शासकीय कार्यालयाकडू आचारसंहितेचा भंग होणार नाही यावरही निवडणूक आयोग लक्ष ठेवून आहे. दरम्यान रेल्वे प्रशासनाकडून आचारसंहितेचा उल्लंघन होत असल्याचा प्रकार घडत आहे. रेल्वे तिकीटांवर पंतप्रधान नरेंद्र मोदी यांचा फोटो असल्यामुळे वाद निर्माण झाला होता. या संदर्भात निवडणूक आयोगाने दखल घेतल्यामुळे रेल्वे मंत्रालयाने मोदींचा फोटो असलेले तिकीट परत मागवले होते. परंतु, पुन्हा एकदा रेल्वे मंत्रालयाने आचारसंहितेचा भंग करण्यास सुरुवात केल्याचे समोर आले आहे.

निवडणूक आयोगाने प्रचारात भारतीय सैन्याचा उल्लेख करू नका सांगूनही पंतप्रधान मोदी सैन्याच्या नावावर मत मागतात, त्याचप्रमाणे रेल्वे प्रशासन आचार संहितेचा भंग करत मोदींचा फोटो असलेले तिकीट प्रवाशांना देत आहे. लोकसभा निवडणुकीपूर्वी रेल्वे प्रशासानाने पंतप्रधान मोदींचा फोटो असलेले तिकीट मागे घेण्याचे सांगितले होते. परंतु, मोदींचा फोटो आणि सरकारी योजनेचा फोटो असलेले तिकीट उत्तर प्रदेशातील बारबंकी स्टेशनवर प्रवांशाना देण्यात येत आहे. या स्टेशनवर आचारसंहितेची राजरोसपणे पायामल्ली सुरू आहे.

लखनौपासून ३० किमी अंतरावर असलेल्या बाराबंकी शहरात एका व्यक्तीने रविवारी रेल्वेचे तिकीट काढले. ज्यावर मोदींचा फोटो होता, तसेच सरकारी योजनेची माहिती देण्यात आली होती. संदर्भात मोहम्मद शब्बीर यांनी रेल्वे प्रशासनाकडे तक्रार कऱण्याचा प्रयत्न केला. मात्र त्यांना दमदाटी करून पिटाळून लावण्यात आले. यावर रेल्वे प्रशासनाला विचारण्यात आल्यानंतर चुकून मोदींचा फोटो असलेले तिकीट मशिनमध्ये लावल्याचे सांगण्यात आले.