रेल्वे स्टेशन, तुर्भे परिसरातील स्वच्छतेची मनपा आयुक्तांकडून पाहणी

नवी मुंबई । वाशी आणि सीबीडी बेलापूर रेल्वे स्टेशन आणि परिसरातील स्वच्छतेची महापालिका आयुक्त डॉ. रामास्वामी एन. यांनी प्रत्यक्ष पाहणी करून स्वच्छ सर्वेक्षण 2018 च्या अनुषंगाने मौलिक सूचना दिल्या तसेच वाशी येथील महापालिका सार्वजनिक रुग्णालयास अचानक भेट देऊन तेथील कामकाजाची व रुग्णसेवा सुविधांची पाहणी केली. पाहणी दौर्‍यात आयुक्तांनी वाशी स्टेशनला भेट दिली व त्यावरील इन्फोटेक पार्कमधील साफसफाई करणारी संस्था व्हीआरएससीसीएल यांचेशी चर्चा करून त्यांना नियमित स्वच्छतेविषयी व कचर्‍याच्या ओला व सुका वर्गीकरणाविषयी सूचित केले. त्याचप्रमाणे स्टेशनवर ठरावीक अंतरावर ओला व सुका कचर्‍यासाठी लहान आकाराच्या स्वतंत्र कचराकुंड्या लावणेबाबत रेल्वे प्रशासनाला सूचना दिल्या.

रेल्वे स्टेशनवरून रोज हजारो प्रवासी प्रवास करतात. त्यामुळे हा परिसर आकर्षक असणे शहराच्या सौंदर्यीकरणासाठी महत्त्वाची बाब असल्याचे लक्षात घेऊन त्यांनी वाशी रेल्वे स्टेशनबाहेरील 500 मीटरपर्यंतच्या परिसराची साफसफाई तसेच सुशोभीकरण करणेबाबत निर्देशित केले. रेल्वे स्टेशनमध्ये जाण्यायेण्यासाठी रघुलीला मॉलकडील बाजूने असलेले दोन्ही प्रवेशद्वारे बंद करण्याच्याही सूचना त्यांनी दिल्या. रघुलीला मॉलसमोरील मोकळ्या जागेत कचरा टाकला जातो व संपूर्ण परिसर अस्वच्छ दिसतो. याबाबत तीव्र नाराजी व्यक्त करत त्यांनी त्याठिकाणी कचरा टाकला जाऊ नये याकरिता तातडीने प्रतिबंधात्मक उपाययोजना करण्याच्या सूचना दिल्या तसेच तेथे फलक लावण्यात यावेत असे सूचित केले. याअनुषंगाने त्यांनी स्टेशनमधील शौचालयांचीही पाहणी केली व त्याठिकाणी नियमित स्वच्छता राहील याकडे विशेष लक्ष देण्याचे सूचित केले.

कचराकुंड्या लावण्याचे आदेश
वाशी बसडेपो येथील टॉयलेट तसेच इतर ठिकाणची इ टॉयलेट नियमित कार्यान्वित राहण्यासाठी आवश्यक गोष्टींचे त्वरित पूर्तता करण्याचे निर्देश त्यांना दिले. अशाचप्रकारे सी.बी.डी.बेलापूर रेल्वे स्टेशनला भेट देऊन त्यांनी वाशी रेल्वे स्टेशनप्रमाणेच तेथील आवश्यक त्रुटींची पूर्तता करण्याचे निर्देश दिले. यामध्ये विशेषत्वाने फलाटांवर कचराकुंड्या नसल्याने नागरिकांकडून होणार्‍या अस्वच्छतेला आळा घालण्यासाठी तेथे ओल्या व सुका कचर्‍यासाठी स्वतंत्र कचराकुंड्या लावण्याचे सूचित केले. स्वच्छतेच्या अनुषंगाने तुर्भे विभागाची पाहणी करताना आयुक्तांनी हनुमाननगर येथील सार्वजनिक व सामुदायिक शौचालयांची पाहणी केली व तेथील आवश्यक दुरूस्ती, साफसफाई, परिसर सुधारणा याबाबत त्वरित कार्यवाही करण्याचे निर्देश दिले.