लंगोट नसला तरी भाजपा कुस्तीसाठी तयार !

युतीसंदर्भात जलसंपदामंत्र्यांचे सूचक वक्तव्य
जळगाव- लंगोट शिवलेला नसला तरी आम्ही तयार असू व कुस्ती झाल्यास विजय आमचाच होईल, असा विश्‍वास जलसंपदा मंत्री गिरीश महाजन यांनी आज जळगावात व्यक्त केला. सहकार राज्यमंत्री गुलाबराव पाटील यांनी युतीसंदर्भात केलेल्या वक्तव्यावरून ना. महाजन बोलत होते. युती व्हावी, अशीच आमची इच्छा असल्याचेही त्यांनी यावेळी स्पष्ट केले.

सहकार राज्यमंत्री गुलाबराव पाटील यांनी काही दिवसांपूर्वी युती व्हावी, अशी आमची इच्छा आहे, मात्र वेळ पडल्यास आम्ही लंगोट बांधून तयार राहू, असे वक्तव्य केले होते, यासंदर्भात जलसंपदा मंत्री गिरीश महाजन यांना आज विचारणा केली असता, गुलाबराव हे मोठे पहेलवान आहेत, ते नेहमी खिशात लंगोट घेऊन फिरतात. मात्र युती होणे न होणे हे माझ्या किंवा त्यांच्या हातात नाही, वरिष्ठ पातळीवर हे निर्णय होतील. युती व्हावी, हीच आमची इच्छा आहे, युती होईल, याबाबत आम्ही सकरात्मक आहोत. आम्ही लंगोट शिवलेला नाही, मात्र वेळ पडल्यास आमच्याकडे कापड तयार आहे, लंगोट शिवायला अधिक वेळ लागणार नाही, आम्हीही तयार राहू व कुस्ती झाल्यास विजय आमचाच होईल हे मात्र नक्की, असे वक्तव्य ना. महाजन यांनी आज केले.