लडाखमध्ये हिमस्खलन; वाहनांसह १० जण अडकले

श्रीनगर: लडाखमध्ये मोठ्या प्रमाणात हिमस्खलन झाले आहे. अनेक वाहनांना याचा फटका बसला आहे. काही वाहने बर्फाच्या खाली गेली आहेत. त्यामध्ये १० जण अडकल्याचे सांगण्यात येत आहे. भारतीय लष्कराचे पथक तातडीने घटनास्थळी पोहोचले. सध्या या ठिकाणी बचावकार्य सुरू आहे. वातावरणात सतत बदल होत असल्याने लष्कराला अडचणींचा सामना करावा लागत आहे.

लडाखसह संपूर्ण जम्मू-काश्मीरमध्ये सध्या हिमवादळाने धुमाकूळ घातला आहे. आज सकाळी ७ वाजेच्या सुमारास लडाखमधील खारदुंगलामध्ये रस्त्यावर बर्फाच्या डोंगराचा काही भाग कोसळला. याचा फटका पर्यटकांना बसला. खारदुंगला भागात जगातील सर्वात उंचीवर असणारा रस्ता आहे. या ठिकाणचं तापमान उणे १५ अंश सेल्सिअस आहे. या ठिकाणी बर्फाच्या डोंगराचा काही भास कोसळल्याने काही पर्यटक अडकले आहेत. याशिवाय हिमवादळामुळेही काही जण अडकून पडले आहेत.