लाचखोर पोलिसांना 2 दिवसांची पोलिस कोठडी

जळगाव। भुसावळ ते जळगाव दरम्यान अवैध प्रवासी वाहतूक करणार्‍या वाहनचालकांकडून 200 रुपयांची लाच घेताना एका पोलिस कर्मचार्‍याला शुक्रवारी लाचलुचपत प्रतिबंधक विभागाच्या पथकाने रंगेहाथ अटक केली. तर याच चालकाकडून चार दिवसांपूर्वी पाच हजारांची लाच मागणार्‍या पोलिसालाही याच प्रकरणात अटक करण्यात शुक्रवारी एसीबीने अटक केली.

लाच प्रकरणातील दोघांना शनिवारी अतिरीक्त सत्र न्यायाधीश चित्रा हंकारे यांच्या न्यायालयात हजर केले असता त्यांनी 2 दिवसांची पोलिस कोठडी सुनावली आहे. तक्रारदार मोतीराम सुपडू केदारे (वय 40) हे जळगाव-भुसावळ मार्गावर प्रवासी वाहतूक करणारी गाडी चालवतात. त्याच्याकडून नशिराबाद पोलिस ठाण्याचे कर्मचारी चंद्रकांत विक्रम पाटील (वय 36, रा.पिंप्राळा, नशिराबाद पोलिस ठाणे), लक्ष्मण पाटील (वय 47, रा.शाहुनगर, शहर वाहतूक शाखा) यांनी लाच मागितल्या प्रकरणी एसीबीच्या पथकाने शुक्रवारी अटक केली. त्यांना न्यायाधीश चित्रा हंकारे यांच्या न्यायालयात हजर केले असता त्यांनी 2 दिवसांची पोलिस कोठडी सुनावली. सरकारतर्फे अ‍ॅड. मोहन देशपांडे यांनी कामकाज पाहिले.