‘लेवाशक्ति सखी मंच’तर्फे पाककला स्पर्धा संपन्न

पिंपरी-चिंचवड : महिलांच्या अंगी असलेल्या कला-गुणांना वाव मिळावा, म्हणून ‘लेवाशक्ति सखी मंच’च्या वतीने पाककला स्पर्धेचे आयोजन करण्यात आले होते. ही स्पर्धा बुधवारी शरदनगर, चिखली येथे प्रणाली चौधरी यांच्या निवासस्थानी मोठ्या उत्साहात पार पडली. स्पर्धेसाठी त्यांनी सर्वोतोपरी मदत केली. या स्पर्धेला मंचच्या सदस्य असलेल्या महिलावर्गाचा उदंड प्रतिसाद लाभला. गव्हाचे पीठ तसेच हरभरा डाळीच्या पिठापासून लज्जतदार खाद्यपदार्थ सुगरण सखींनी तयार केले होते.

महिलावर्गाच्या अंगी असलेल्या कला-गुणांना वाव मिळावा, त्यांना आपली कला सादर करण्यासाठी हक्काचे व्यासपीठ उपलब्ध व्हावे, या उद्देशाने लेवाशक्ति सखी मंचच्या वतीने महिलांसाठी नेहमी विविध कार्यक्रमांचे आयोजन करण्यात येते. याच अनुषंगाने ठिकठिकाणी पाककला स्पर्धा आयोजित केल्या जात आहेत. बुधवारी आयोजित केलेल्या स्पर्धेत लेवाशक्ती सखी मंचच्या अनेक महिला सदस्यांनी सहभाग नोंदवला होता. या स्पर्धेच्या संयोजनासाठी लेवाशक्ती सखी मंचच्या गौरी सरोदे, रेखा भोळे, विभावरी इंगळे, चारुलता चौधरी, सुलभा धांडे, किरण पाचपांडे, रजनी बोंडे आदींनी पुढाकार घेतला. परीक्षण किरण पाचपांडे यांनी केले.

15 रोजी निकाल लागणार
लेवाशक्ति सखी मंचच्या वतीने 13 एप्रिल रोजी चिंचवड, बिजलीनगर येथे पाककला स्पर्धा पार पडणार आहे. सर्व स्पर्धांचे निकाल 15 एप्रिल रोजी दैनिक ‘जनशक्ति’च्या द्वितीय वर्धापन दिनानिमित्त आयोजित समारंभात जाहीर करण्यात येणार आहेत. दरम्यान, लेवाशक्ति सखी मंचतर्फे 23 रोजी मंचच्या सदस्य असलेल्या महिलांसाठी कोकणात सहल काढण्यात येणार आहे. सहलीत सहभागी होण्यासाठी इच्छूक महिला सदस्यांनी संपर्क साधावा, असे आवाहन रेखा भोळे यांनी केले आहे.