लोकसभा निवडणुकीत भाजपाचा पराभव निश्चित – अरविंद केजरीवाल

चंदीगड : पंतप्रधान नरेंद्र मोदी सरकारला लोक कंटाळले आहेत. लोकांना बदल हवा आहे. लोकसभा निवडणुकीत भाजपाचा पराभव निश्चित आहे. आगामी लोकसभा निवडणुकीत पंजाबमधील एकूण 13 जागांवर आम आदमी पार्टी (आप) लढवणार असल्याचे पार्टीचे राष्ट्रीय समन्वयक आणि दिल्लीचे मुख्यमंत्री अरविंद केजरीवाल यांनी रविवारी सांगितले.

आगामी लोकसभा निवडणुकीच्या पार्श्वभूमीवर बरनावाला शहरात आम आदमी पार्टीच्या निवडणूक अभियानाला सुरुवात झाली. यावेळी अरविंद केजरीवाल यांनी येथील संगरुरमध्ये पत्रकारांशी संवाद साधला. अरविंद केजरीवाल यांनी पंजाबमधील काही वरिष्ठ नेत्यांशी चर्चा केली. यामध्ये खासदार भगवंत मान, विरोधी नेता हरपाल चीमा आणि आमदार अमन अरोरा यांच्या समावेश होता. दरम्यान, आम आदमी पार्टीने पंजाबमधील लोकसभा जागांसाठी पाच उमेदवारांनी नावे गेल्या ऑक्टोबरमध्ये जाहीर केली होती. यामध्ये संगरुर, फरीदकोट, होशियारपूर, अमृतसर आणि आनंदपूर साहिब या मतदारसंघांचा समावेश आहे. आम आदमी पार्टीने गेल्या 2014 च्या लोकसभा निवडणुकीत पंजाबमध्ये चार जागा जिंकल्या होत्या.