वडलीच्या तरुणाचा पाय घसरून पडल्याने मृत्यू

जळगाव : पाय घसरून पडल्यानंतर झालेल्या गंभीर दुखापतीमुळे उपचारादरम्यान 30 वर्षीय तरुणाचा मृत्यू झाला. ही घटना तालुक्यातील वडली येथे सोमवारी रात्री घडली. गोपाल नामदेव दहिपाते (30, रा.वडली) असे मयताचे नाव आहे. याबाबत एमआयडीसी पोलिस ठाण्यात अकस्मात मृत्यूची नोंद करण्यात आली आहे.

डोक्याला झाली गंभीर दुखापत
गोपाल दहिपाते हा तरुण शेती काम करून कुटुंबाचा उदरनिर्वाह करतो. सोमवार, 28 फेब्रुवारी रोजी रात्री 10 वाजेच्या सुमारास कामावरून घरी आल्यानंतर गल्लीत त्याचा पाय घसरला. यात गोपालच्या डोक्याला गंभीर दुखापत झाल्याने त्याला रात्री 11 वाजता शहरातील खाजगी रूग्णालयात उपचारार्थ दाखल करण्यात आले. तपासणी केल्यानंतर डॉक्टरांनी शासकीय रूग्णालयात नेण्याचा सल्ला दिला. रात्री 11.30 वाजता शासकीय वैद्यकीय महाविद्यालयात उपचारार्थ दाखल केले असता वैद्यकीय अधिकारी यांनी मयत घोषीत केले. मंगळवार, 1 मार्च रोजी सकाळी 10 वाजता शवविच्छेदन झाल्यानंतर मृतदेह नातेवाईकांच्या ताब्यात देण्यात आला. गोपाल याच्या पश्चात पत्नी, आई, वडील व दोन मुले असा परीवार आहे. या प्रकरणी एमआयडीसी पोलिस ठाण्यात अकस्मात मृत्यूची नोंद करण्यात आली.