वाकडच्या शेतकर्‍याला सव्वा कोटीस गंडा!
जमीन विक्रीतून आलेले पैसे म्युच्यूअल फंडात गुंतविण्यास पाडले भाग
पिंपरी-चिंचवड : वाकड येथे राहणार्‍या एका शेतक-याची तब्बल 1 कोटी 19 लाख 75 हजार रुपयांची फसवणूक केल्याचा प्रकार समोर आला आहे. हा फसवणुकीचा प्रकार डिसेंबर 2016 ते मार्च 2017 दरम्यान घडला. बापू नामदेव वाकडकर (वय 65, रा. वाकड, पुणे) यांनी चिंचवड पोलीस ठाण्यात फिर्याद दिली आहे. त्यानुसार सूरज प्रकाश बोरोले (वय 35), किरण नितेश सिंग, नितेश कुमार सिंग (तिघेही रा. सेलीना पार्क, हडपसर, पुणे) यांच्याविरोधात फसवणुकीचा गुन्हा दाखल करण्यात आला आहे.
आरोपींनी केला चेकबुकचा वापर
सहाय्यक पोलीस निरीक्षक सतीश कांबळे यांनी दिलेल्या माहितीनुसार, वाकडकर यांनी वाकड येथे असलेली वडिलोपार्जित जमीन एका बांधकाम व्यावसायिकाला विकली. त्याचे पैसे त्यांनी एचडीएफसी बँकेत ठेवले. बँकेने डिसेंबर, 2016 मध्ये त्यांच्या खात्यावरील व्यवहार पाहण्यासाठी आरोपी सूरज याची नेमणूक केली. सुरुवातीला सूरजने चोख व्यवहार पाहिले. काही कालावधीनंतर काही पैसे म्युच्यूअल फंडमध्ये गुंतवण्याचा सल्ला सूरजने वाकडकर यांना दिला. त्याचा फायदा समजल्यानंतर वाकडकर यांनी त्यास संमती दिली. तसेच वाकडकर यांच्या खात्यावरील काही रक्कम अ‍ॅक्सिस बँकेत फिक्स डिपॉझिटमध्ये गुंतवण्याचा देखील सल्ला दिला. त्यासाठी बँकेचे काढलेचे चेकबुक सूरजने स्वतःकडे ठेवून घेतले.
पैसे स्वत:च्याच खात्यावर वळविले
चेकबुकवर आणि कोर्‍या कागदावर वाकडकर आणि त्यांची पत्नी, मुलगा आणि सुनेच्या सह्या घेतल्या. वाकडकर यांच्या खात्यावरून वेळोवेळी तब्बल 1 कोटी 12 लाख रुपये काढून स्वतःच्या खात्यावर ठेवले. तसेच वाकडकर यांच्या सुनेला मुलांच्या भवितव्यासाठी गुंतवणूक करण्याचे कारण सांगून त्यांच्याकडून 31 महिने दरमहा 25 हजार रुपये घेतले. ते पैसे देखील सूरजने स्वतःच्या खात्यावर ठेवले. दरम्यान, एचडीएफसी बँकेने सूरजला नोकरीवरून काढून टाकले.
तिघांवर फसवणूकीचा गुन्हा
नोकरीवरून काढून टाकल्याची माहिती सूरजने वाकडकर यांच्यापासून लपवून ठेवली. वाकडकर यांना वेळोवेळी थोडीफार रक्कम देऊन आणि पैसे असल्याचे भासवून त्यांची दिशाभूल केली. एक वर्षाचा कालावधी उलटल्यानंतर आपल्याला कोणत्याही प्रकारचा फायदा झाला नसल्याचे तसेच सूरजने आपली फसवणूक केल्याचे वाकडकर यांच्या लक्षात आले. त्यावरून सूरज आणि त्याचे दोन साथीदारांविरोधात फसवणुकीचा गुन्हा दाखल करण्यात आला. सहाय्यक पोलीस निरीक्षक सतीश कांबळे तपास करीत आहेत.