वायसीएममध्ये जाणवतोय रेबीज लसीचा तुटवडा

रुग्णांना शोधावा लागतो दुसरा पर्याय

पिंपरी : पिंपरी-चिंचवड महापालिकेच्यावतीने उभारण्यात आलेल्या यशवंतराव चव्हाण मेमोरिअल हॉस्पिटल येथे पिंपरी-चिंचवड शहरातील, उपनगरातील आणि जवळपासच्या गावांमधून अनेक रूग्ण उपचारासाठी येत असतात. सरकारी रूग्णालय असल्याने उपचार कमी खर्चात होत असल्याने अनेक गरीब घरातील रूग्ण येथे येत असतात. सध्या सर्वत्र भटक्या कुत्र्यांची संख्या मोठी आहे. त्यामुळे कुत्र्यांनी चावल्यास खासगी रूग्णालयात महागडे उपचार असतात. त्यामुळे अनेक नागरिक येथे रेबिज लस घ्यायला येतात. मात्र गेल्या पंधरावड्यात रेबीज प्रतिबंधक लसीचा तुटवडा जाणवू लागला होता. लस वेळेत उपलब्ध होत नसल्यामुळे रुग्णांना ऐनवेळी दुसरा पर्याय शोधावा लागत होता. मात्र, सद्यस्थितीत वायसीएम रुग्णालयात रेबीज प्रतिबंधक लस पुरेशा प्रमाणात उपलब्ध झाली असल्याची माहिती, रुग्णालयाच्या औषध भांडार विभागाने दिली आहे.

रूग्णांना ससूनमध्ये हलविले

शहरासह राज्यभरातील विविध भागातून पिंपरी-चिंचवड महापालिकेच्या वायसीएम या रुग्णालयात अनेक आजारांवरील उपचार घेण्यासाठी रुग्णांची मोठ्या प्रमाणात गर्दी असते. मात्र, काही दिवसांपूर्वी रुग्णालयात श्‍वानदंशावरील लस उपलब्ध नसल्याने रुग्णांच्या नातेवाईकांना ऐनवेळी धावपळ करावी लागत होती. लस संपल्याने कित्येक रुग्णांमध्ये पुण्यातील ससून रुग्णालयात हलविण्यात आले होते. सद्यस्थितीमध्ये वायसीएमच्या औषध भांडारामध्ये 20 लस शिल्लक असून काही लस रुग्णालयाच्या तातडीक विभागामध्ये देण्यात आलेल्या आहेत. मागील काही दिवसांमध्ये शहरामध्ये भटक्या कुत्र्यांचा उपद्रव मोठ्या प्रमाणात वाढला आहे. शहरात श्‍वानदंशाच्या अनेक घटना घडलेल्या आहेत. मात्र, लस अभावी रुग्णालय प्रशासन हतबल होते. सध्या, लस उपलब्ध झाल्याने श्‍वानदंश झालेल्या रुग्णांची गैरसोय टळणार आहे.