विक्रेत्यांना भाजी मंडईतील गाळ्यांचे वाटप करावे

नगरसेवक नाना काटे यांची मागणी

सांगवीः पिंपळे सौदागर येथे लाखो रुपयांचा निधी खर्च करून उभारण्यात आलेल्या लोकशाहीर अण्णाभाऊ साठे भाजी मंडई वापराविना पडून आहे. अद्याप या मंडईचे उद्घाटन करण्यात आले नाही. या परिसरात अनेक भाजीवाले रस्त्यावर भाजी विकायला बसलेले दिसतात. त्यामुळे वाहतुकीला अडचण होते. त्यामुळे या मंडईतील गाळ्यांचे वाटप करून पिंपळे सौदागरमधील ठिकठिकाणच्या भाजी विक्रेत्यांचे तेथे स्थलांतर करण्यात यावे, अशी मागणी राष्ट्रवादीचे नगरसेवक नाना काटे व नगरसेविका शीतल काटे यांनी महापालिका आयुक्त श्रावण हर्डीकर यांच्याकडे केली आहे. या संदर्भात नगरसेवक काटे दाम्पत्याने आयुक्त हर्डीकर यांना निवेदन दिले आहे.

लाखोंचा निधी गेला पाण्यात
नगरसेवक काटे यांनी निवेदनात म्हटले आहे की, महापालिकेच्यावतीने पिंपळे सौदागर येथे लोकशाहीर अण्णाभाऊ साठे भाजी मंडई उभारण्यात आली आहे. लाखो रुपये खर्चून उभारण्यात आलेली ही मंडई गाळे वाटपाअभावी वापराविना पडून आहे. भूमी आणि जिंदगी विभागाच्या उदासीनतेमुळे गाळेवाटप रखडलेले आहे. त्यामुळे ही मंडई बांधण्यासाठी झालेला लाखोंचा निधी पाण्यात गेला आहे. या भाजी मंडईचा वापर होत नसल्यामुळे तेथे गैरप्रकार होण्याची शक्यता नाकारता येत नाही. पिंपळे सौदागर परिसरातील लोकसंख्या पाहता नागरिकांना भाजीपाला व फळे खरेदी करण्यासाठी पिंपरी भाजी मंडई अथवा आठवडे बाजारामध्ये जावे लागते.

अतिक्रमण कमी होईल
तसेच परिसरात अनधिकृत पथारी भाजी विक्रेत्यांचे प्रमाण वाढलेले आहे. अशा रस्त्यावरील अनधिकृत पथारीवाल्यामुळे रहदारीस व वाहतुकीस अडथळा येत असून, वाहतूककोंडीला कारणीभूत ठरत आहे. महापालिकेने बांधलेली मंडई कार्यान्वित झाल्यास पिंपळे सौदागरमध्ये रस्त्यांच्या कडेने आणि चौकाचौकांत भाजी विक्रेत्यांचे अतिक्रमण कमी होईल. वाहतूककोंडीतून वाहनचालकांची सुटका होईल. त्यामुळे येथील भाजी मंडईमध्ये भाजी विक्रेत्यांचे स्थलांतर करून पिंपळे सौदागार हॉकर्समुक्त करण्यात यावा, अशी मागणी त्यांनी केली आहे.