विजया राजाध्यक्षांचा जनस्थान पुरस्काराने सन्मान

नाशिक । मराठी साहित्यात मानाचा समजला जाणारा व कुसुमाग्रज प्रतिष्ठानच्या वतीने देण्यात येणारा यंदाचा जनस्थान पुरस्कार कविश्रेष्ठ कुसुमाग्रज यांच्या जन्मदिनी मराठीतील ज्येष्ठ लेखिका डॉ. विजया राजाध्यक्ष यांना कुसुमाग्रज प्रतिष्ठानचे अध्यक्ष व ज्येष्ठ साहित्यिक मधु मंगेश कर्णिक यांच्याहस्ते सोमवार 27 फेब्रुवारी रोजी महाकवी कालिदास कलामंदिर येथे सायंकाळी 6 वाजता प्रदान करण्यात आला.

विजया राजाध्यक्ष या मराठी साहित्यात चौफेर विषयावर लेखन करणार्‍या म्हणून परिचित असल्या तरी त्यांचा मुख्य कल हा कथा लेखकाचा राहिला आहे. त्या स्त्रीवादी लेखिका व समीक्षक म्हणून परिचित असून, त्यांनी मुंबईच्या एल्फिन्स्टन महाविद्यालय व एसएनडीटी विद्यापीठात मराठीचे अध्यापन केले आहे. शिक्षण घेत असतानाच त्यांनी आपल्या लेखनाला सुरुवात केली.