विस्तारीकरण प्रस्ताव सीएमकडे

पुणे । लोहगाव विमानतळाच्या विस्तारीकरणासाठी आवश्यक असलेली खासगी जमीन मालकांची जागा ताब्यात घेण्याचा निर्णय घेण्यात आला आहे. लोहगावच्या विमानतळाच्या पार्किंग आणि वाहतूककोंडीबाबत 21 हेकटर जमीनही लवकरच संपदित केली जाणार असून या जागेचा मोबदला टीडीआर स्वरूपात देणे ही शक्य नसल्याने त्याचा टाउन प्लॅनिंगमध्ये समावेश केला असून नगर विकास विभागाने प्रस्ताव मुख्यमंत्र्यांकडे सादर केला असल्याचे जिल्हाधिकारी सौरभ राव यांनी सांगितले.

लोहगाव विमानतळासाठी पंधरा एकर जागा ताब्यात घेण्यास मान्यता
हवाई प्रवाशांची वाढती संख्या लक्षात घेऊन लोहगाव येथील विमानतळाचे विस्तारीकरण करण्याचा निर्णय सरकारने घेतला आहे. त्यासाठी केंद्रीय वाहतूक मंत्री नितीन गडकरी यांनी देखील एक वर्षांपूर्वी पुण्यात येऊन बैठक घेतली होती. या बैठकीमध्ये विमानतळाच्या विस्तारीकरणासाठी लगतची पंधरा एकर जागा ताब्यात देण्यास हवाई दलाने तत्वत: मान्यता दिली होती. तसेच विमानतळाच्या नऊशे मीटरच्या परिसरातील नो डेव्हलपमेन्ट मधील खासगी जमिन मालकांची जागा ही ताब्यात घेण्याचा निर्णय राज्य सरकारने घेतला होता. त्यामुळे एअरपोर्ट अ‍ॅथॉरिटीकडून विमानतळ विस्तारीकरणाचा आराखडाही तयार करून तो मान्यतेसाठी पाठविण्यात आला. त्यास मान्यता देखील मिळाली. मात्र विस्तारीकरणासाठी आवश्यक असलेली जागा अद्याप ताब्यात येऊ न शकल्याने हे काम सुरू झाले नव्हते.

मोबदल्यापोटी 60 ते 70 कोटी
लोहगाव विमानतळाच्या विस्तारीकरणासाठी वेकफिल्ड चौकातील इंडिया ऑईल कंपनीची पंधरा एकर जागा मिळावी, अशी मागणी एअरपोर्ट अ‍ॅथॉरिटीने केली आहे. परंतु या जागेच्या मोबदल्यात विमानतळाच्या नऊशे मीटरच्या परिसरात येणार्‍या जागेपैकी पंधरा एकर जागा मिळावी, असा आग्रह हवाई दलाने घेतला आहे. अथवा विमानतळाच्या परिसरातील जागा हवाई दलास हवी असल्यास त्या जागेचा मोबदल्यापोटी 60 ते 70 कोटी रुपयांहून अधिक रोख रक्कम देता येत नाही त्यामुळे टीडीआर देण्यात येणार होता मात्र जागा नो डेव्हलपमेंट झोन मधील असल्याने टीडीआर देणे ही शक्य नसल्याने जागेचा टाउन प्लॅनिंग समावेश केला असून महापालिकेकडे डीपी तयार होत आहे. जिल्हाधीकारी कार्यालयाकडुन नगरविकास विभागाकडे प्रस्ताव पाठविला होता, नगर विकास विभागाने त्यांचा प्रस्ताव मुख्यमंत्र्यांकडे सादर केला असुन मुख्यमंत्री कार्यालयाकडून सकारात्मक काम सुरू असल्याचे राव यांनी सांगितले.