वुहानमध्ये पुन्हा निर्बंध लागू

वुहान – चीनमध्ये संसर्गाची दुसरी लाट सुरू होण्याची भीती असतानाच आता वुहानमध्ये पुन्हा निर्बंध लागू करण्यात आले असून लोकांना घरातच राहण्यास सांगण्यात आले आहे.

लक्षणे न दाखवणार्‍या पण करोनाचा संसर्ग असलेल्या लोकांची संख्या वाढत असून नऊ आठवड्यांची टाळेबंदी शिथिल करण्यात आली असली तरी ती केवळ नावालाच शिथिल राहील असा याचा अर्थ आहे. २५ मार्चला वुहानला जोखीममुक्त जाहीर करण्यात आले होते. उच्च जोखीम वरून वुहानला आता मध्यम जोखीम असल्याचे जाहीर करण्यात आले होते.

स्थानिक अधिकार्‍यांनी सांगितले की, लक्षणे नसलेले ५१ रुग्ण असून ७४२ जणांना देखरेखीखाली ठेवण्यात आले आहे. स्थानिक प्रशासनाने वुहान मधील रहिवाशांना घरातच राहण्यास सांगितले असून लोकांनी त्यांची तापाची तपासणी करत रहावी व मास्क घालावेत असे आवाहन केले आहे. २३ जानेवारीपासून वुहान शहर सीलबंद करण्यात आले होते. ८ एप्रिलला बाहेरील प्रवास निर्बंध उठवण्यात येणार आहेत.