व्यापार्याला मारहाण करणार्या आरोपींना पोलिस कोठडी
भुसावळ- दुकानाबाहेर बसलेल्या तरुणांच्या टोळक्याला उठावयास सांगितल्याचा राग आल्याने मद्यधूंद दोघा तरुणांनी व्यापार्याच्या डोक्यात सोड्याची बाटली मारून दुखापत केल्याची घटना शनिवारी सायंकाळी साडेसहा वाजेच्या आठवडे बाजार भागातील अप्सरा चौकाजवळील न्यू वैशाली प्रोव्हीजनबाहेर घडली होती. या प्रकरणी दोघा आरोपींना अटक करण्यात आली होती. आरोपींना रविवारी भुसावळ न्यायालयात हजर केले असता त्यांना दोन दिवसांची पोलिस कोठडी सुनावण्यात आली. अप्सरा चौकातील न्यू वैशाली प्रोव्हीजनबाहेर तीन तरुण बसले असताना सुधीर दत्तात्रय वाणी (67, शनी मंदिर वॉर्ड) यांनी त्यांना दुकानाच्या रस्त्यात बसले असल्याने उठावयास सांगितले असता संशयीत आरोपी शफिक शुभराती गवळी (21, ताज नगर, नसरवांजी फाईल, भुसावळ) व आदिल अलियार तडवी (32, नसरवांजी फाईल, भुसावळ) यांनी त्यांच्याशी वाद घातला तर एकाने सोडा वॉटरच्या गाडीवरील एक बाटली वाणी यांच्या डोक्यात मारून दुखापत केली. या घटनेत त्यांच्या डोक्याला तीन ते चार टाके पडले. वाणी यांनी या प्रकरणी दोघा आरोपींविरुद्ध गुन्हा दाखल केला. तपास उपनिरीक्षक मनोज ठाकरे करीत आहेत.