शहरात घरफोड्या करणार्‍या चोरट्यांचा उच्छांद

पुणे : शहरात गेल्या काही दिवसांपासून चोरट्यांनी उच्छांद घातला असून, केवळ दोन दिवसात बंद फ्लॅट फोडून चाळीस लाख रुपयांवर डल्ला मारला आहे. विशेष म्हणजे, चोरट्यांचे धाडस दिवसेंदिवस वाढत आहे. कोरेगाव पार्कमध्ये भरदिवसा घरफोडी केली. तर, तेथून लोखंडी कपाटात बसवण्यात आलेली इलेक्ट्रीक तिजोरीच चोरट्यांनी पळवली आहे. तर, शहरात या घटना दिवसेंदिवस वाढत आहेत. पोलिसांच्या डोळ्यात धूळ फेकत चोरटे लाखोंचा माल लंपास करत असून या घटना रोखण्यात पोलिसांना अपयश आले आहे. पोलिसांनी केलेल्या उपाययोजनांचे धिनदवडे निघाल्याचेही या घटनांवरुन दिसून येत आहे. कोरेगांव पार्क, डेक्कन, चतुश्रृंगी, सिंहगड तसेच भारती विद्यापीठ परिसरांमध्ये चोरट्यांनी धुमाकूळ घातला आहे.

कोरेगांव पार्क परिसरात राहणारे वासुदेव लक्ष्मणदास मेगानी (वय 43) यांच्या घरात डल्ला मारला आहे. मेगानी यांचा नेलर रोडवर जशनमहल कॉ. सोसायटीमध्ये फ्लॅट आहे. ते त्यांच्या कुटूंबियांसोबत राहतात. त्यांचा पाण्याचे पंप विकण्याचा व्यावसाय आहे. तर, त्यांच्या पत्नीचे कॉम्प परिसरात फॅशन स्टुडीओचे गारमेंट्सचा व्यावसाय सुरु केला आहे. मेगानी यांनी सुरक्षतेसाठी सेफ्टी डोअर बसवले आहे. तसेच, घरात दोन लोखंडी कपाट आहेत. त्यातील एका कपाटात त्यांनी लोखंडी इलेक्ट्रीक तिजोरी बसवली आहे. दरम्यान त्यांच्या कॉम्प परिसरात पत्नीने सुरु केलेल्या दुकानाचे गुरुवारी उद्घाटन होते. त्यामुळे ते व कुटूंबिय सकाळी घराला कुलूप लावून उद्घाटन समारंभासाठी कॉम्पात आले होते. त्यांचे इतर नातेवाईकही येथे आले होते. दरम्यान च्या काळात चोरट्यांनी सेफ्टी डोअर तसेच आतील दाराचे कुलूप तोडून घरात प्रवेश केला. घरातील दोन्ही लोखंडी कपाट उचकटले. त्यातील एका कपाटात बसवण्यात आलेली लोखंडी तिजोरीच चोरट्यांनी काढून नेली. त्यामध्ये असणारे तेरा लाख 80 हजार रुपयांचे सोन्याचे व चांदीचे दागिने लंपास केले आहेत. त्यांचे नातेवाईक आराम करण्यासाठी दुपारी साडे चार वाजता घरी आले. त्यांवेळी त्यांना दार उघडे दिसले. त्यानंतर हा प्रकार समोर आला. याप्रकरणी कोरेगाव पार्क पोलीस ठाण्यात गुन्हा दाखल करण्यात आला असून, अधिक तपास पोलीस निरीक्षक भोसले हे करत आहेत.

कोरेगाव पार्कची घटना ताजी असताना चतुश्रृंगी परिसरात चोरट्यांनी मोठा डल्ला मारला. सदाशिव रामा बंजन (वय 72) यांनी याप्रकरणी तक्रार दिली आहे. सदाशिव बंजन यांचा ते बाणेर रस्त्यावरील सेलम नामावाच बंगला आहे. त्यांची इंजिन मशिनचे टुल्स बनवण्याची फॅकटरी आहे. दरम्यान तीन दिवसांपुर्वी ते कुटूंबियांसोबत त्यांच्या मेव्हण्याचा तेरावा असल्याने कर्नाटक येथे बंगल्याला कुलूप लावून गेले होते. त्या दरम्यान चोरट्यांनी त्यांच्या घरावर डल्ला मारला. कुलूप तोडून चोरट्यांनी घरात प्रवेश केला. घरामधील कपाट असणारे 70 तोळे सोने, 2 किलो चांदी तसेच दिड लाख रुपये रोख चोरुन नेले आहेत. बंजन हे शुक्रवारी दुपारी पुण्यात आले. ते घरी गेल्यानंतर चोरी झाल्याचे समोर आले. त्यानंतर त्यांनी पोलिसांना माहिती दिली. याप्रकरणी चतुश्रृंगी पोलीस तपास करत आहेत.
–सिंहगड पोलीस ठाण्याच्या हद्दीत नर्‍हे आंबेगावमध्ये बाबुराव सदाशिव सावंत (वय 43) आणि समाधान शिंदे व प्रशांत पतंगराव पाटील (वय 47) यांच्या घरी चोरट्यांनी डल्ला मारला आहे. सावंत व शिंदे यांच्या रुनेवरा अ‍ॅनेक्स सोसायटीममधील दोन बंद फ्लॅट फोडण्यात आले आहेत. हा प्रकार गुरुवारी उघडकीस आला. सावंत यांच्या फ्लॅटमधून तब्बल एक लाख 80 हजार रुपयांचे सोन्याचे दागिने व रोकड लंपास करण्यात आली आहे. तर, शिंदे यांच्या फ्लॅटमधून एक लाख 10 हजार रुपयांचा ऐवज चोरीला गेला आहे. तर, सनसिटी येथील कमल हौसिंग सोसायटीमझील पाटील यांच्या फ्लॅट बुधवारी फोडल्याचे आढळून आले. त्यांचा फ्लॅटमधून चोरट्यानी 34 हजार 800 रुपयांचे सोन्याचे दागिने व रोकड लंपास केली आहे. याप्रकरणी सिंहगड रोड पोलिस ठाण्यात गुन्हा दाखल करण्यात आला आहे.

तसेच, कात्रज येथील संदीप ज्ञानेश्वर दाते (वय 40) यांचे बुधवारी फ्लॅटचे कुलुप उचकटून घरफोडी केली. श्रीराम सहकारी निवास सोसायटीमधे ही घटना घडली. चोरट्यांनी कपाटातील दोन अमेरिकन डॉलर व इतर ऐवज असा 29 हजार रुपयांचा मुद्देमाल चोरून नेला आहे. याप्रकरणी भारती विद्यापीठ पोलिस ठाण्यात गुन्हा दाखल करण्यात आला आहे. तर, चोरट्यांनी विमानतळ परिसरातील केदार रमेश सेनगावकर (वय 67) यांचा बंद फ्लॅट फोडून सोन्याचे दागिने व रोख रक्कम असा 67 हजार रुपयांचा ऐवज चोरीला गेला आहे. बाणेर येथील सागा बंगला ग्रीनपार्क येथेली अलका श्रीकांत पांडे (वय 65) यांचा घरामध्ये एक लाख आठ हजार रुपयांची घरफोडी झाल्याचा प्रकार समोर आला आहे. पांडे या अमेरिकेला गेल्या होत्या. त्या बुधवारी परत आल्यानंतर त्यांना घरातील जपानी चलानाच्या नोटा व इतर ऐवज आसा एक लाख आठ हजार रुपयांची चोरी झाल्याचे आढळून आले. याप्रकरणी चतुःश्रुंगी पोलिस अधिक तपास करत आहेत. तर, वाकड येथील कल्पतरू हारमोली सोससायटीतील फ्लॅट बनावट चावीने उघडून आतमधील दोन लाख रुपयांचा मुद्देमाल चोरीला गेल्याचा प्रकार समोर आला आहे. याप्रकरणी विनायक अग्रवाल यांनी तक्रार दिली आहे. याप्रकरणी वाकड पोलिस ठाण्यात गुन्हा दाखल करण्यात आला आहे.

अन्यथा ही चोरी तीन कोटी रुपयांचा चोरी
चतुश्रृंगी परिसरात बंजन यांच्या घरातून 70 तोळे, 6 किलो 750 चांदी तसेच एक लाख 65 हजार रुपयांच्या मालवार चोरट्यांनी डल्ला मारला आहे. मात्र, बंजन यांनी सोने व चांदि फार वर्षापुर्वी खरेदी केले आहेत. त्यांनी खरेदी करताना सोन्याचा व चांदिचा दर अताच्या दरापेक्षा अत्यल्प होता. त्यामुळे गुन्ह्यात त्याची किंमत 17 लाख 6 हजार रुपये ठरवण्यात आली आहे. अन्यथा आजच्या भावाने हे सोने व चांदि तीन कोटी रुपयांच्या घरात त्याची किंमत आहे.

चोरट्यांचा उच्छांद अन पुणेकर भयभित
केवळ दोन दिवसात चोरट्यांनी बंद फ्लॅट हेरुन त्याद्वारे सोने-चांदि व रोकड लंपास केली आहे. मात्र, केवळ दोन दिवसांमध्ये आठ घरफोड्या झाल्या आहेत. तर, गेल्या आठवड्यातही चोरट्यांनी उच्छांद घालत घरफोड्या केल्या आहेत. स्थानिक व गुन्हे शाखेचे पोलिस चोरट्यांना पकडण्यासाठी जंग-जंग पछाडत आहेत. मात्र, अद्याप तरी पोलिसांच्या हातात ठोस असेही काही लागलेले नाही.