शिवसृष्टीचा प्रश्‍न मार्गी लागल्याने भाजपचा जल्लोष
पुणे । कोथरूड येथील कचरा डेपोच्या जागेवर मेट्रो रेल्वेचे यार्डच करण्यात येईल. लगतच्या सर्वे नंबर 99 व 100 मधील बीडीपी क्षेत्रात शिवसृष्टी करूयात. यासाठी आरक्षण बदल व जागा ताब्यात घेण्यासाठी येणारा खर्च याचा विस्तृत आराखडा तयार करावा असा असा आदेश मुख्यमंत्री देवेंद्र फडणवीस यांनी आज मुंबई येथे झालेल्या बैठकीत दिले. यामुळे मेट्रो आणि शिवसृष्टी या दोन्हीचा मार्ग मोकळा झाला आहे याचा जल्लोष महापालिकेत भाजपकडून करण्यात आला.महापालिकेने कोथरूड येथील कचरा डेपोच्या जागेवर शिवसृष्टी उभारण्याचा प्रस्ताव मंजूर केला आहे. परंतु महामेट्रोने या जागेवर मेट्रो डेपोचे नियोजन केले आहे. महापालिकेने केलेल्या ठरावाची अंमलबजावणी करावी आणि या जागेवर शिवसृष्टी उभारावी यासाठी नगरसेवक दीपक मानकर आणि कोथरूड येथील नगरसेवक पाठपुरावा करत आहेत. महापौरांनी याप्रकरणी मुख्यमंत्र्यांसोबत बैठक घेण्याचे आश्‍वासन दिले होते. त्यानुसार आज मुंबई येथील सह्याद्री भवन येथे मुख्यमंत्र्यांच्या अध्यक्षतेखाली सर्व पक्षीय पदाधिकार्‍यांची बैठक झाली, अशी माहिती महापौरांनी दिली.
टिळक म्हणाल्या, मेट्रो यार्डचे काम त्याच ठिकाणी होईल. हे काम थांबवू नये असे आवाहन त्यांनी यावेळी विरोधकांना केले. या जागेलगतच बिडीपीचे क्षेत्र आहे. 28 एकर जागेवर शिवसृष्टीचे नियोजन करू. यासाठी आरक्षण बदल करण्यासोबत भूसंपादनासाठी येणारा खर्च याचा अहवाल तयार करण्याचे आदेश त्यांनी आयुक्तांना दिला. मेट्रोचे अधिकारी, कला दिग्दर्शक नितीन देसाई यांनी यावेळी मेट्रो व शिवसृष्टी प्रकल्पाचे प्रेसेंटशन केले. याप्रसंगी गिरीश बापट, माधुरी मिसाळ, जगदीश मुळीक, मुरलीधर मोहोळ, श्रीनाथ भिमाले, चेतन तुपे, अरविंद शिंदे, संजय भोसले यावेळी उपस्थित होते.